I gatshëm për dialog me qeverinë e Spanjës, por nuk lëviz asnjë milimetër nga premtimet për pavarësinë e Katalonjës. Kjo është deklarata më e fundit e Carles Puigdemont, president i rajonit, i cili gjithashtu shprehu kritika të forta për mbretin Felipe VI.
Mediat ndërkombëtare, duke cituar Puigdemont, shkruajnë se mbreti i Spanjës, paragjykoi referendumin për pavarësinë e Katalonjës dhe foli për rëndësinë e unitetit.
“Mbreti ka diskurs dhe bën politikën e qeverisë Rajoy, që ishte katastrofale për Katalonjën. Ai injoroi miliona katalonjas të cilët nuk mendojnë si ai”, tha Puigdemont.
Në vijim ai shtoi se mbreti ka zhgënjyer shumë katalonjasit që e kanë ndihmuar në kohë të vështira dhe nuk reagoi aspak për dhunën e policisë së Madridit.
Mbreti i Spanjës e ka shpallur referendumin jodemokratik dhe anti- Kushtetues.
Ndërkohë qeveria spanjolle ka instaluar në Katalonja dy formacione ushtarake, që janë transportuar nga 20 kamionë, por nuk ka të dhëna për numrin e tyre. Ushtarët po zëvendësojnë trupat e gardës civile që u larguan nga Katalonja, pas referendumit të së dielës.
Ndërkohë policia, e cila ndërhyri dhunshëm në ditën e referendumit në qendrat e votimit, sot po përballet me hakmarrjen e banorëve të Katalonjës. Mediat vendase raportojnë se policëve dhe gardës civile nuk i ofrohen shërbime në lokale dhe restorante, ndërkohë që në rrugë në drejtim të tyre hidhen fyerje dhe akuza. /tesheshi.com/
