Policia e Shtetit është detyruar të lëshojë një deklaratë në lidhje me ndalimin e ish-deputetit Kastriot Islami një natë më parë, pasi ky i fundit pretendonte se ndalimi ndaj tij ishte bërë me urdhër politik, më saktë të Ramës, e jo pse thjesht nuk mbante maskën sipas detyrimit.
Madje sipas Policisë, ai dhe ka fyer efektivët policorë.
“Në mënyrë të përsëritur shtetasi Kastriot Islami është prononcuar publikisht me pretendimin që Policia e Shtetit e ka keqtrajtuar. E vërteta është se ky shtetas ka keqtrajtuar punonjësit e patrullës policore me një fjalor shumë të ulët.
Kastriot Islami është ndaluar nga patrulla e Përgjithshme si një kalimtar pa maskë. Ai menjëherë ka lëshuar ndaj punonjësve të policisë fjalë të ulëta, duke pretenduar se ai ishte një figurë publike që nuk mund të ndalohej prej tyre. Madje shtetasi i ka kërcënuar punonjësit e policisë, që ‘Do ta shihnin pas 25 prillit, si të gjithë zagarët e Ramës’!
Patrulla e policisë është detyruar ta shoqërojë atë në komisariat, ku janë kryer procedurat ligjore dhe i është komunikuar gjoba për mosmbajtjen e maskës mbrojtëse.
Duke hedhur poshtë akuzat e fabrikuara nga shtetasi Kastriot Islami për Policinë e Shtetit dhe shprehur keqardhjen për fjalorin e tij ndaj punonjësve tanë, gjejmë rastin të theksojmë se Policia e Shtetit nuk i shërben politikës por ligjit”, thuhet në deklaratën e Policisë së Shtetit.
E në fakt, në reagimet pas ndalimit e më pas lirimit nga policia, Islami është vetëpotencuar si një figurë publike, duke arsyetuar se për këtë arsye ai nuk mund të ndalohej. /tesheshi.com/
