Familje Kastrati, a më saktë Shefqet Kastrati, i trajtuar si oligark nga zërat opozitarë, ka vendosur që të dhurojë 1.5 milion euro për të përballuar pasojat e tërmetit.
I sulmuar se po merrte tarifën te trau në Kalimash edhe nga automjetet me ndihma, si koncensionar i mirëmbajtjes së Rrugës së Kombit, ai thotë se kjo nuk po ndodh.
“Tragjedia Shqiptare më ka tronditur thellësisht mua dhe familjen time, bashke me vëllezerit e mi. Jemi munduar të ndihmojmë e të lehtësojmë sa mundemi këto ditë. Si gjithnjë – pa zhurmë. E kam dhënë në çast urdhërin e mosmarrjes së asnjë kokërr leku nga askush që ka kaluar nëpër Rrugën e Kombit për ndihmë”, thuhet në deklaratën e Kastratit.
Më tej, ai kujdeset të veçojë faktin se kontribuon gjithnjë, porse nuk preferon bujën. Pa bërë asnjë publicitet, sepse gjithmonë kam ecur me parimin: ‘Kur ndihmon një rob të Zotit në nevojë, duhet ta shohë veç ai lart!’. Unë dhe familja ime kemi ndarë 1.5 milionë euro që kjo dhimbje e madhe që të lehtësohet sado pak.
Vendosëm ta bëjmë publik kontributin tonë për familjet e tërmetit vetëm që t’i bëjmë thirrje atyre që kanë më shumë se të tjerët: Kjo s’është dita të kurseje asgjë shqiptari që ka shumë për shqiptarin që ka humbur gjithçka! Ngushëllime familjarëve që humbën njerëz në këtë katastrofë dhe Zoti i Madh qoftë me Shqipërinë e plagosur!”, deklaron Kastrati. /tesheshi.com/
