Kjo hartë satirike nga vitet 1870 tregon një Europë në krizë, e tërbuar nga tensionet që në korrik të atij viti do të shpërthenin në luftën franko-prusiane. Pasojat politike të konfliktit janë të rënda: poshtërimi francez me humbjen e Alsasë-Lorenës dhe frikërat britanike për një Gjermani tashmë të unifikuar e shumë më të fuqishme – do të luanin rol madhor në nisjen e Luftës së Parë Botërore më shumë se 40 vjet më pas.
Edhe pse bën fjalë për një subjekt serioz, harta arrin të tejçojë pak humor ndaj çështjes, duke paraqitur kombet në karikatura komike. Prusia përshkruhet me një figurë gjigande me pamje prej lope deti të vetë “Kancelarit të Hekurt”, Otto von Bismarck. Franca mjaullin e përshkruar si një ushtar Zuave nga kolonitë franceze të Afrikës së Veriut, i cili shihet sesi në mënyrë heroike përmban putrën prusiane. (është me vlerë të vihet në dukje se harta është publikuar së pari në Francë).
E pikturuar në hartë si një grua e moshuar, Britania është “e izoluar dhe e mbushur me zemërim”, duke u kthyer nga ana tjetër me vendosmëri përkundër ngjarjeve në kontinent, pothuajse duke harruar siç na mëson kapitulli i radhës, Irlandën e përshkruar si një qenushe e lezetshme që mbahet e lidhur me litar.
Gradët e gjatësisë së hartës shënohen me trupa pushkësh, një aludim interesant për gjendjen shpërthyese të situatës. Harta është vepër e ilustruesit dhe karikaturuesit Paul Hadol (1835-1875), i cili me raste punonte edhe nën një pseudonim pothuajse enigmatik “E Bardha”.
Edhe pse hartat-karikatura ekzistonin në Europë që nga shekulli i 14-të, kjo është e para në të cilën format e vendeve u përmbahen me saktësi atyre reale në formën e personazheve, një stil që do të përsëritej përgjatë pjesës së mbetur të shekullit të 19-të dhe në fillim të shekullit të 20-të.
Në të vërtetë, versioni i publikuar nga “The Economist” është një riprintim gjerman nga viti 1914, që duket se është riprodhuar për të shoqëruar një hartë të re të animuar të Europës që ilustronte tensionet që i paraprinë luftës së parë botërore.
Përgatiti: Juli Prifti- /tesheshi.com/
