Nga Blendi Gashi
18 vjet më parë ishte krenari që një kosovar të posedojë një kartelë që tregonte se është pjesë e Ushtrisë Çlirimtare të Kosovës, dhe kjo vazhdoi edhe për ca vite pas çlirimit.
Por sot gjërat kanë ndryshuar aq shumë sa siç duket respekti ka humbur edhe për këtë lëvizje, pasi ditë më parë në një grumbull mbeturinash, skaj një rruge në lagjen “Matiqan” të Prishtinës, janë gjetur disa kartela që dëshmojnë se poseduesit e tyre janë veteranë dhe ish-pjesëtarë të UÇK-së, kartela, këto të lëshuara nga Organizata e Veteranëve të Luftës së UÇK-së, me vlefshmëri njëvjeçare.
Në mesin e kartelave të gjetura në bërlog janë edhe dy që i takojnë ish-komandantit të luftës, kryetarit të dikurshëm të Lipjanit dhe aktualisht deputetet të PDK-së, Shukri Buja.
Ky ndihet keq për veprimin e bërë nga individë të caktuar që tashmë kartelat e tij por edhe të ish-ushtarëve tjerë të UÇK-së konsiderohen të denja për t’u hedhur në plehra.
“Këto ishin kartela të cilat vlejnë një vit dhe merren të reja. Kartelat përmbajnë të dhëna personale si numrin e letërnjoftimit, nivelin komandues, vendbanimin, etj, dhe mbrohen nga ligji për mbrojtjen e të dhënave personale dhe është dashur të kihet kujdes. E keqja më e madhe është përdhosja emblema e UÇK-së me të cilën ranë shumë luftëtar, është një historik edhe i pasluftës të një organizimi të veteranëve thjeshtë është goditje në ndjenja që lidhen me luftën”, thotë deputeti Buja për tesheshi. com.
“U shkel ligji…”
Edhe Agjencia Shtetërore për Mbrojtjen e të Dhënave Personale ka reaguar lidhur me rastin e hedhjes së disa kartelave identifikuese të veteranëve të Ushtrisë Çlirimtare të Kosovës, e që besohet se janë hedhur nga Organizata e Veteranëve të Luftës së UÇK-së.
Sipas kësaj agjencie, ky veprim, duke ditur se këto kartela përmbajnë të dhëna që e identifikojnë subjektin e të dhënave, përbën shkelje të Ligjit për Mbrojtjen e të Dhënave Personale.
Kjo agjenci tha se në këtë rast, OVL e UÇK-së do të duhej të ishte më e kujdesshme, në mënyrë që mos t’i cenojë të dhënat personale të anëtarëve të saj, duke ndërmarrë të gjitha masat e duhura që ato të mbrohen sipas parimeve dhe masave të përcaktuar me ligj dhe po ashtu të shkatërrohen në rast se nuk janë më të nevojshme.
“S’ka faj Shoqata, por vet veteranët”
Gani Koci, ish-ushtar i UÇK-së thotë se pë rastin në fjalë nuk duhet fajësuar OVL e UÇK-së, por vet veteranët.
“Faji është i neve, veteranëve, qe kurr nuk shkuam t’i tërheqim ato kartela, kurr nuk shkuam të paguajmë atë shumë të vogël të anëtarësimit tonë! Kurrë nuk u interesuam, ne që mbajmë poste politike, si si funksionon Shoqata e veteranëve, me çfarë vështirësish përballet!
Në për Shoqatën interesohemi veç në prag të zgjedhjeve kur kemi ndonjë përfitim personal, por jo që të t’i kryejmë obligimet tona si anëtarë të saj! Ne, po e përbaltim Shoqatën dhe vlerat e UÇK-së!”, thotë Koci.
Kujtojmë se zyra për vërtetime e veteranëve të UÇK-së që është funksionalizuar para një muaji, ka lëshuar vërtetime për 3 mijë e 500 qind veteranë që kanë mbetur pa marrë pensione tash e sa muaj.
“UÇK e pavdkeshme, nuk baltoset”
Zafir Berisha, ish-ushtar i UÇK-së e tani deputet, mendon se një numër i madh nuk i kanë merituar kartelat e veteranëve të UÇK-së.
Përndryshe, sipas tij fyerjet dhe përdhosja e vlerës më sublime është bërë nga njerëz të papërgjegjshëm të cilët duke u thirrë në luftë kanë bërë veprime anti-shtetërore dhe kështu kanë plogështuar respektin për luftën e lavdishme.
“Unë nuk kam kartelë të veteranëve sepse asnjëherë s’kam menduar se kartela të bën veteran. Në anën tjetër, nëse dikush ka qenë veteran i vërtetë dhe e ka njollos shenjën e UÇK-së dyshoj se edhe në luftë e ka pasur me gjithë mend. UÇK është baltos nga krerët e shtetit pasi edhe spijuna dhe bashkëpuntor të Serbisë kanë bërë veteran. Mendoj se herët apo vonë do të dalin në shesh shumë gjëra të poshtra që janë bërë në emër të luftës çlirimtare. UÇK është e pavdekshme dhe është thellë në historinë e Kosovës dhe çdo tendencë për ta fyerë dhe baltos atë vlerë do të dështoj”, thotë Berisha për tesheshi. com. /tesheshi.com/
