Edmond Panariti është një nga zyrtarët e LSI-së, i cili ka mbajtur poste qeveritare qoftë kur kryeministër ka qenë Sali Berisha, ashtu edhe kur në këtë pozicion e mbante Edi Rama. Panariti ka drejtuar ministrinë e Jashtme dhe atë të Bujqësisë, ndërsa ka rrëfyer detaje nga jeta e tij, të panjohura deri më sot.
I ftuar në “Vila 24”, Panariti tregoi se profesioni i tij i parë kishte qenë kovaç. Ai tha se kurrë nuk e kishte menduar që do të katapultohej në politikë dhe tregoi telefonatën e parë më ish-kreun e kësaj partie, Ilir Metën, Presidentin aktual të vendit.
“Kam qenë kovaç i kategorisë së katërt është një element i jetës sime që nuk e kam ndarë më parë me publikun. Po ju shpegoj që kovaçana është një pjesë e një uzine ku bëhet farkëtimi i detaleve, edhe aty mund të bëhet karrierë, fillohet nga kategoria e 4 dhe shkon tek e 7-ta. Aty i kam marrë leksionet e para nga jeta. E preka realitetin, njerëzit e thjeshtë, mësova shumë prej tyre, pas shumë vitesh përçapje mora të drejtën e studimit për Veterinari, edhe pse kisha kërkuar mjekësi”,rrëfen Panariti.
I pyetur nëse e kishte menduar të bëhej ndonjëherë ministër, Panariti u shpreh se “si veteriner nuk e kisha menduar se do bëhesha ministër i Bujqësisë, por që do më thërrisnin të isha ministër i Jashtëm kjo ka qenë surpriza më e madhe në jetën time”.
Panariti flet edhe për telefonatën e parë që i ka bërë Ilir Meta, e cila i është dukur si një shaka e stisur nga miqtë e tij.
“Kam pasur një ftesë personale nga Ilir Meta që në atë kohë kërkonte prurje të reja. Më telefonoi vetë ai, isha në shtëpi. Më tha jam Ilir Meta, unë e mora si shaka, se bënin miqtë e mi shaka të tilla. Më pas e besova, më kërkoi miqësisht të pinim një kafe. U takuam e biseduam, me kërkoi të isha pjesë e LSI dhe unë që nga ajo ditë nuk jam penduar për këtë zgjedhje”, tha Panariti. /tesheshi.com/
