Njeriu që e udhëhoqi Brazilin në fitimin e Kupës së Botës së 1970-s, duke shënuar madje dhe një gol në finalen e aktivitetit, ka ndërruar jetë në moshën 72-vjeçare.
Karlos Alberto shënoi golin e katërt ndaj Italisë në finalen e luajtur në të famshmin stadium “Azteca” në Meksiko, një prej tetë golave që ai realizoi në 53 takimet e aktivizuara me përfaqësuesen braziliane.
Ai është cilësuar si një nga mbrojtësit më të mirë të të gjitha kohërave. Kapiteni i Brazilit të famshëm të viteve ’70 të shekullit të shkuar arrinte ta lexonte jashtëzakonisht mirë lojën, kishte aftësi të shkëlqyera tribluese, si dhe zotëronte një kontroll mahnitës të topit.
Ai luajti me dy prej skuadrave të njohura braziliane gjatë karrierës së tij, me Fluminensen dhe Santosin, duke fituar trofe me to.
Pasi la futbollin e luajtur në vitin 1982, zgjodhi të bënte detyrën e trajnerit. Për herë të fundit drejtoi Azerbajxhanin në vitin 2005, për ta mbyllur dhe këtë faqe të karrierës së tij sportive.
Së fundi ai punoi si komentator për rrjetin brazilian Sportv, dhe paraqitjen e fundit e pati dy ditë më parë.
Në vitin 1998 ai u zgjodh në ekipin e botës të shekullit të njëzetë, dhe në 2004-n u përfshi në FIFA 100 për lojtarët më të mëdhenj të botës që ishin në jetë.
FIFA do ta emëronte atë si një prej gjashtë ambasadorëve për Kupën e Botës 2014 në Brazil. /tesheshi.com/
