Gazetari italian i shqiptarizuar, Karlo Bolino, ish-themelues i Gazeta Shqiptare e News 24, sot drejtues i Shqiptarja.com dhe A1 Report, ka fituar një gjyq për shpifje ndaj ish-liderit demokrat Berisha.
Bolino e quan këtë si një “vendim historik”, gjatë një komentimi që i ka bërë rrugëtimit deri te fitorja juridike përballë akuzave të Berishës.
“Pas 25 vjet shpifjesh, të bëra pa dallim kundër kujtdo që ai e konsideronte ‘kundërshtar’, pra edhe kundër meje, për herë të parë Sali Berisha u dënua nga një Gjykatë për shpifje. Madje eshte hera e pare qe Drejtesia e denon per dicka. Beteja ime gjyqësore u fitua. Sali Berisha është njohur fajtor si shpifës, pasi ajo çka kishte shkruar dhe deklaruar kundër meje ishte krejtësisht false dhe për këtë duhet të më dëmshpërblejë me 100.000 lekë të reja: natyrisht shifra është simbolike, por mund të ishte edhe vetëm 10 lekë, ajo që ka rëndësi këtu është thelbi. Vendimi është historik, pasi edhe politika këtej e tutje do të duhet të fillojë të respektojë peshën e fjalëve dhe vlerën e së vërtetës”, shkruan Bolino.
Ndërkaq, italiani që së fundi ka marrë dhe nënshtetësi shqiptare, tregon se çfarë do të bëjë me shumën e caktuar nga gjykata për dëmshpërblim moral.
“Këtë shumë unë do ta ve në dispozicion të financimit të një konkursi për gazetarë të rinj, me të cilin do t’u jap çmim dy artikujve më të mirë kushtuar luftës kundër shpifjeve dhe Fake news-eve.
Duket si një ëndërr: paratë e doktorit do të shërbejnë për të shpërblyer ata që, më në fund, i bëjnë jehonë vlerës të së vërtetës”, përfundon Bolino.
Nga vetë Berisha ende nuk ka reagim mbi gjyqin e humbur. /tesheshi.com/
