Zbulohet plani i Federatës Serbe të Futbollit për të ndaluar pranimin e Kosovës në UEFA, që nga të gjithë shikohet si një version i mundshëm.
Siç bën të ditur e përditshmja e Beogradit Politika, presidenti i Federatës së Futbollit të Serbisë, Tomislav Karaxhiq, bëri të ditur se ai ka arritur aleanca të forta dhe lobime të pathyeshme në Kongresin e Budapestit.
“Nga vitit 2012, federata ia ka arritur qëllimin që të ndalojë Kosovën që të pranohet në organizatat ndërkombëtare. Me shumë mundime ia kemi arritur që të kërkohet zyrtarisht rishikimi i rendit të ditës, që është një padrejtësi e madhe”, tha Karaxhiq për faqen e internetit të federatës.
Sipas tij, tashmë siuata bëhet më e vështirë pas shuplakës që sipas tij Serbia mori nga Komiteti Olimpik Ndërkombëtar.
“KON-i, (Komiteti Olimpik Ndërkombëtar) me vendimin e tij për të pranuar Kosovën ka hapur derën për hyrjen e saj edhe në organizatat e tjera”, tha kreu u ftubollit serb.
Sipas tij, lëvizja është shumë e vështirë pas vendimit të UEFA-s për pranimin e Gjibraltarit dhe Gjykatës së Abritrazhit në Lozanë. Shumë vende janë anëtarë të UEFA-s edhe pa qenë anëtarë të OKB-së. Skocia, Irlanda e Veriut, Uellsi, janë vetëm disa nga shembujt. Gjibraltari është vetëm ai më i freskti.
Kreu i Federatës së Serbisë duket se nuk ka shumë çtë bëjë, por sërish në vend që të merret me problemet e spotit ai bën politikë. Fundja nëse do të mbështeste Kosovën do të merrte një votë plus për çështjet që i intereson Serbisë, por nacionalizmi ekstrem i ka mbyllur sytë.
Megjithatë, Karaxhiq thekson se krej dy javësh ka zhvilluar takime të ndryshme me anëtarë të federative që marrin pjesë në UEFA.
Ditën e martë nis kongresi i Organizatës Europiane të Futbollit në Budapest, që ka si qëllim zgjedhjen e strukturave të reja pas skandalit të korrupsionit që sollën largimin e Michele Platini-së.
Në seancën e tretë që zhvillohet më 4 maj është parashikuar ndryshimi i statutit të UEFA-s, ku do të përcaktohet në mënyrë të qartë që anëtar i organizatës mund të bëhet edhe ai shtet që nuk është anëtar OKB-së.
Në fakt kjo ka ndodhur gjithmonë, siç e kemi thënë më sipër me pjesëtaret e Mbretërisë së Bashkuar, madje edhe Gjykata e Lozanës e ka sanksionuar me vendim. Por siç duket UEFA synon ta shkruajë më qartë në statut. Dhe pas kësaj, do të zhvillohet votimi për të pranuar Kosovën, që merret me votat e të gjithë anëtarëve të Asamblesë nga e gjithë Europa.
Këtu hyn lobimi që Federata e Futbollit të Kosovës ka bërë. Ndryshe nga rasti i UNESCO-s, shumica e vendeve europiane, anëtare të UEFA-s e kanë njohur Kosovën. Por kjo s’do të thotë shumë. Polonia që e ka njohur Kosovën votoi kundër në UNESCO. Ndërkaq, Hungaria, që është vendi organizator i kongresit po bëhet gjithnjë e më shumë partner i ngushtë i Serbisë.
Përgatiti: Ylli Pata – /tesheshi.com/
