“Maria” pritet të kthehet në një stuhi të fuqishme e të rrezikshme, ndërsa po i afrohet ishujve Leeward në Karaibe.
Stuhia, e cila për momentin është e kategorisë së parë, pritet të fuqizohet ndjeshëm përgjatë dy ditëve në vijim.
Sipas parashikimeve të Qendrës Kombëtare amerikane të stuhive, ajo do të godasë ishullin pasditen e së hënës.
“Maria” po lëviz në trajektoren ku më parë kaloi uragani “Irma”, që shkatërroi pothuajse rajonin. Paralajmërime si pasojë e stuhisë janë lëshuar për Guadeloupe, Dominica, St. Kitts dhe Nevis, Monserrat dhe Martinique.
Një situatë mbikëqyrjeje e stuhisë është në fuqi edhe për ishujt amerikanë e britanikë Virgin, St. Martin, St. Barts, Saba, St. Eustatius dhe Anguilla.
Disa prej këtyre ishujve ende nuk e kanë marrë veten pas goditjes nga “Irma”, stuhia e kategorisë së pestë që la të paktën 37 viktima dhe shkaktoi dëme miliarda dollarëshe.
Në përllogaritjet e fundit, “Maria” konsiderohet me erëra prej rreth 137 km në orë.
Syri i stuhisë është ende 140 milje në verilindje të Barbadosit, ndërsa “Maria” po lëviz drejt perëndimit dhe veriperëndimit me të paktën 20 km në orë.
“Në trajektoren e parashikuar, qendra e stuhisë ‘Maria’ do të kalojë përmes ishujve Leeward gjatë pasdites së të hënës dhe mesnatës, e më pas do t’i drejtohet verilindjes së detit të Karaibeve të martën dhe deri në mesnatë”, thuhet nga Qendra Kombëtare amerikane e stuhive.
“Irma” la më shumë se 2/3-tat e shtëpive në pjesën holandeze të ishullit St. Martin (Sint Maarten) të pabanueshme, pa energji elektrike dhe pa furnizim me gaz apo ujë të pijshëm.
Qeveria franceze njoftoi se pjesa franceze e ishullit të njohur edhe si Saint Martin pësoi 1.2 miliardë euro dëme, me 9 të vdekur të regjistruar. Në ishujt Virgin britanikë, e gjithë zona e banimit ka mbetur e rrafshuar. Pas një vizite në zonë, Sekretari britanik i Jashtëm, Boris Johnson e përshkroi shkatërrimin si diçka që “nuk është parë që prej Luftës së Parë Botërore”. /tesheshi.com/
