Policia sekuestroi 1 ton e 110 kilogramë kanabis në gadishullin e Karaburunit në Vlorë, por pa mundur të kapë trafikantët.
Mendohet se droga do të transportohej me skaf drejt brigjeve italiane, ndërsa drejtuesi i mjetit lundrues ka mundur t´i shpëtojë policisë.
Policia nisi kërkimet në det gjatë ditës së djeshme pas një telefonate se një gomone ishte larguar nga baza e qëndrimit të mjeteve lundruese, pa kryer procedurat e daljes në det.
Operacioni i nisur prej orës 14:00 të ditës së martë vijon ende për kapjen e trafikantëve.
Lënda narkotike u gjet e shpërndarë në zonën pyjore, bashkë me pesë mushka me të cilat ishte bërë transporti dhe më pas ajo do të vendosej në skaf.
Sipas një njoftimi zyrtar të policisë, gjatë kërkimit, në vendin e quajtur “Zhapovel” në Karaburun është konstatuar një gomone, e cili ecte me shpejtësi në drejtim të bregut të detit.
Në ndjekje të mjetit lundrues me një person në bord, janë vënë mjetet lundruese të Policisë Kufitare, Delta Force, Guardia di Finanzes dhe Rojës Bregdetare. Personi ka braktisur në breg të detit në Karaburun gomonen me një motor “Mercury” 150 hp dhe është larguar duke përfituar edhe nga terreni i pyllëzuar në këtë zonë.
Nga toka kanë shkuar forca të tjera të Policisë Kufitare Vlorë , Repartit Special “Delta”, të cilët kanë bërë krehjen e të gjithë zonës, por nuk është arritur të gjendet personi i larguar nga mjeti lundrues.
Për shkak të terrenit të vështirë dhe errësirës, shërbimet e përbashkëta janë lënë në terren gjatë gjithë kohës, për tu riorganizuar sërish në mëngjesin e datës 6 shtator.
Në orët e para të mëngjesit, shërbime të përbashkëta të Policisë Kufitare Vlorë, Drejtorisë Vendore të Policisë Vlorë, Repartit Special “Delta”, Guardia di Finanza dhe Rojes Bregdetare kanë filluar sërish krehjen e zonës ku u gjet mjeti lundrues dhe të zonës përreth, në të cilën dyshohej se fshihej lënda narkotike që do të trafikohej me mjetin lundrues gomone.
Nga kontrolli i ushtruar në të gjithë zonën, në vendin e quajtur “Depot e Valanidhit” në Karaburun, midis Gjirit të Bristanit dhe Gjirit të Gramës në Karaburun, u arrit të gjendej një sasi lënde narkotike Cannabis Sativa, 1 110 kg, e paketuar në 54 pako të mëdha, e shpërndarë midis pemëve dhe shkurreve.
Gjithashtu në afërsi të lëndës narkotike në pyll janë gjetur dhe 5 mushka, të cilat dyshohet se janë përdorur për transportimin e lëndës narkotike nga një zonë në tjetrën.
Në drejtorinë Vendore të Policisë Vlorë janë shoqëruar disa persona ndërmjet tyre është marrë në pyetje edhe pronari i gomones, i cili ka deklaruar rreth personit që ka nxjerrë gomonen pa lejen e tij në det, ku vijon puna nga ana e policisë për kapjen e tij./tesheshi.com/
