Partitë politike në Kosovë kanë edhe pak orë afat për të zyrtarizuar koalicionet parazgjedhore për zgjedhjet e 6 tetorit.
Mundësisë për të garuar në një listë të përbashkët i del afati sot në ora 12 para mesnate.
Deri tani, janë nënshkruar dy koalicione parazgjedhore: Aleanca për Ardhmërinë e Kosovës (AAK) e Ramush Haradinajt dhe Partia Socialdemokrate (PSD) e Shpend Ahmetit do të garojnë me një listë të përbashkët zgjedhore, ku kandidat për kryeministër është kryeministri në largim, Ramush Haradinaj.
Ngjashëm janë deklaruar se do të veprojnë edhe Aleanca Kosova e Re (AKR) e Behgjet Pacollit dhe Nisma Socialdemokrate e Fatmir Limajt, ku ky i fundit zyrtarisht është kandidat për shef të ekzekutivit.
Ndërkaq, së paku deri tani e vetme për të garuar në zgjedhje, është deklaruar Partia Demokratike e Kosovës (PDK).Ky subjekt ka zyrtarizuar kandidaturën e Kadri Veselit për kryeministër të vendit.
Kurse, Lidhja Demokratike e Kosovës (LDK) dhe Lëvizja Vetëvendosje (VV) nuk po arrijnë të merren vesh për një koalicion paraprak, për shkak të pozitës së kryeministrit, ku LDK-ja zyrtarisht kandidon me Vjosa Osmanin e VV-ja e përmend në vazhdimësi Albin Kurtin.
Ndonëse ende nuk ka nisur zyrtarisht fushata për zgjedhjet e parakohshme, zyrtarë të subjekteve politike në Kosovë janë mobilizuar për të kërkuar votat e qytetarëve, veprim ky që nisi menjëherë pas dorëheqjes së Ramush Haradinajt muajin e kaluar. /tesheshi.com/
