Katalanasit kanë marrë më në fund frymë thellë pas një muaji të tmerrshëm për ta.
Më 12 mars ka qenë fitorja e fundit për ta në kampionat, një 6-0 ndaj Getafes. Në të njëjtin stil, me një rezultat më tenistik, Barcelona ka fituar në La Korunja ndaj Deportivos 0-8!
0-8! Kjo është Barcelona e vërtetë! Fati i keq i Deportivos që rizgjimi i Barçës të ndodhte në takimin me të.
Në “Estadio Municipal de Riazor” ka patur vetëm një skuadër në fushë, e ajo ka qenë Barcelona. Një ballafaqim që pritej i vështirë, por që ka rezultuar krejt ndryshe. Nuk ka patur kokëçarje për katalanasit, që prej javësh ishin mbërthyer me shpatulla pas muri.
Ka shkëlqyer Luis Suarez në këtë mbrëmje me katër golat e tij. Goli i parë i uruguajanit erdhi në minutën e 11-të. Përveç se e kaloi Barcelonën në epërsi, goli ka shërbyer dhe për të hequr tensionin te lojtarët miq.
Më pas gjithçka ka shkuar si në vaj, ku veç Suarezit kanë shënuar dhe Rakitiç, Messi, Bartra e Nejmar.
Kjo fitore në javën e 34-t të kampionatit spanjoll e mban sërish në krye Barcelonën, pavarësisht nga rezultatet e dy skuadrave të Madridit, Atletikos dhe Realit. /tesheshi.com/
