Beteja juridike prej një dekade për ekstradimin e Dragan Vasiljkoviçit, të njohur si “kapiteni Dragan”, ka marrë fund me arritjen e tij në Zagreb nga Australia.
I dyshuari serb për krime lufte do të përballet me akuzat për tortura dhe vrasje.
Ministri kroat i Drejtësisë, Orsat Miljeniç, nuk e fshehu kënaqësinë në fjalët e tij, “Pas një beteje të gjatë, e cila nisi nëntë vite të shkuara, Dragan Vasiljkoviç u ekstradua…. Nga tani ai do të trajtohet si çdo i dyshuar tjetër.”
Dragan Vasiljkoviç, një instruktor golfi i lindur në Beograd, dyshohet se ka kryer krime lufte gjatë viteve 1991-1995 si komandant paramilitar i një grupi serb që kundërshtonte pavarësinë e Kroacisë.
Autoritetet kroate e akuzojnë atë për keqtrajtim, torturim dhe vrasje të policëve e ushtarakëve kroatë në Knin dhe në Brushka. Po ashtu dyshohet se “kapiteni Dragan” ka urdhëruar një sulm vdekjeprurës në Glina.
Ai i ka mohuar akuzat për krime lufte, por ka pranuar se ka stërvitur rekrutë e se ka vrarë njerëz në luftime.
Kalvari për ekstradimin e tij nisi në vitin 2006, kur ai u arrestuar për herë të parë në Australi. Në 2009-n do të lirohej përkohësisht, për të humbur gjurmët më pas. Arratia e tij mori fund shpejt, për t’u dërguar rishtas në burg, gjersa u ekstradua për në Kroaci. /tesheshi.com/
