Është arrestuar pas orë kërkimi njeriu që morri tre jetë pa iu dridhur dora, për më tepër femre, Dan Hutra, 40 vjeç.
Kreu i policisë së Tiranës, Tonin Vocaj në një konferencë për mediat pasditen e së mërkurës deklaroi se ai përdori të njëjtën armë në vrasjen e tre grave në Tiranë, përfshi 31-vjeçaren Etleva Kurti në Kamëz.
Vocaj tha se Hutra ka përdorur një automjet të marrë me qira për të lëvizur duke nisur nga zona e Astirit ku plagosi me thikë të dashurën për të shkuar më tej në zonën e Kamzës, ku ekzekutoi Etleva Kurtin, dhe më pas në Paskuqan ku vrau motrën dhe të afërmen e ish-bashkëjetueses.
“Është kryer ekspertimi balistik i gëzhojave të sekuestruara në të dy vendngjarjet dhe ka rezultuar se 12 gëzhojat e sekuestruara në ngjarjen e ndodhur në ‘Kodër Kamëz’ dhe 6 gëzhojat e sekuestruara në Kamëz, janë të qitura nga e njëjta armë zjarri”, tha Vocaj.
Ministri i Rendit Bledi Çuçi, pos që përshëndeti kapjen e vrasësit, e cilësoi atë si një kriminel të regjur.
“Një ngjarje e rëndë që mund të ishte shmangur nëse autori do të ishte në burg nga sistemi i drejtësisë në të shkuarën për skedën e tij kriminale”, u shpreh Çuçi, duke shtuar se
“edhe një herë Policia e Shtetit dëshmoi profesionalizëm dhe bëri detyrën duke çuar prapa hekurave autorin, që nuk duhet më kurrsesi t’i shpëtojë ndëshkimit më të ashpër të drejtësisë. Ngushëllime familjeve të viktimave!”.
40-vjeçari ishte një i dënuar për vrasjen e bashkëshortes në 2003-shin, për përdhunimin e kunatës, si dhe për dhunë në familje, ku paçka kësaj dosjeje kriminale dhe dënimeve me burg për to, në fund ishte i lirë. Dhe në këtë liri morri dhe tre jetë.
Tashmë pritet të hetohet nëse drejtësia e ka toleruar këtë delikuent të pamëshirshëm. /tesheshi.com/
