Nga redaksia
Goran Saviq, polic i njësisë për ndërhyrje të shpejtë, NJRSH-së, në veri të Mitrovicës, është arrestuar ditë më parë në Serbi për kontrabandim të armëve dhe municionit drejt Kosovës.
Është bërë i ditur ky fakt nga një burim konfidencial që raporton për tesheshi.com, me kusht anonimiteti.
Sipas burimit, polici i Kosovës Goran Saviq është kapur nga policia e Serbisë në afërsi të kufirit të Kosovës në vendin e quajtur Murina, në mes të qytetit të Rashkës dhe Novi Pazarit, në hyrje të një rruge alternative që të shpie për në Kosovë.
Në anën tjetër, zyrtarë të policisë së Kosovës për rajonin Veri, i kanë thënë portalit tesheshi.com se polici Goran Saviq prej ditësh mungon në punë dhe për këtë është lajmëruar edhe Drejtoria e Policisë së Kosovës në Prishtinë.
Është Besim Hoti, z/Drejtor i Policisë për rajonin Veri që shprehimisht ka thënë se “polici për të cilin po pyesni ka ditë që mungon nga puna. Ai ka marrë disa ditë pushim mjekësor, por nuk është paraqitur në punë sipas detyrës dhe për këtë kemi njoftuar edhe Komandën e Policisë së Kosovës në Prishtinë”.
Por Hoti ka mohuar që ata të jenë në dijeni për faktin se polici i nacionalitetit serb është arrestuar nga ana e policisë serbe duke kontrabanduar armë.
“Policia e Kosovës ka informacion se polici në fjalë nuk ka dalë në detyrë dhe për këtë kemi njoftuar zyrtarët e lartë, por për këtë që pretendon portali tesheshi.com, policia e Kosovës pas verifikimit të informacioneve do t`i drejtohet zyrës ndërlidhëse për sqarim të mëtejme rreth këtij rasti”, ka thënë Hoti.
Në anën tjetër, burimi që përcjell informacionin për arrestimit e policit serb, shton se atij i është caktuar dhe masa “arrest me burg”, por që nuk dihet se në cilin qytet të Serbisë po mbahet nën arrest.
Ka informacione se Goran Saviq, tani polic i Kosovës, por që më parë ka qenë dhe polici i Serbisë, ka vepruar ilegalisht në veri të Kosovës që pas përfundimit të luftës e deri në vitin 2014 ku me marrëveshje të Brukselit në mes të Prishtinës dhe Beogradit,ai është integruar në policinë e Kosovës. Ai njihet shumë në Veri dhe thirret me nofkën Mupovci.
Portali tesheshi.com ka informacione se ai prej kohësh shoqërohet me njerëz të dyshimtë dhe që janë të njohur për vepra të ndryshme kriminale për policinë e Kosovës.
Saviq është shoqëruar me Lubisha Vukuçeviqin, i njohur me nofkën Kapa, e që ka në posedim një pikë të karburanteve në afërsi të pikëkalimit kufitar G 1 në Jarinje të Leposaviqit, si dhe me Millan Mihajlloviqin, ish-pjesëtar i xhandarmërisë serbe, i përjashtuar nga puna për shkak të disa veprave kriminale në Serbi.
Po ashtu burimi shton se ditë më parë, në qytetin e Leposaviqit, në kafiterinë Mistik, një epror i lartë i policisë së Kufirit dhe dy policë të Kosovës të nacionalitetit serb, e kanë gjobitur një shqiptar me mbi 10 mijë euro, pasi më parë e kanë kërcënuar.
Sipas burimit,policët e Kosovës të nacionalitetit serb janë duke bërë garë mese vete se kush do të shkojë në njësinë e kufirit, pasi aty kontrabanda dhe korrupsionin po ju sjellin shumë fitime. /tesheshi.com/
