OKB-ja, në përpjekjet e saj për qetësimin e situatës në Libi, ka bërë të qartë se kriza e zgjatur libiane mund ta destabilizojë të gjithë rajonin.
“Terrorizmi në Libi po bëhet një problem për libianët dhe për rajonin,” u shpreh i dërguari special i OKB-së në Libi, Bernardino Leon.
Leon do të ketë nga sot tre ditë bisedime me delegacionet libiane, që do të zhvillohen në Rabat, dhe që shihen si një prej mundësive të fundit për ta ndaluar vendin nga përfshirja në një luftë civile të përgjithshme.
Bisedimet do të përqendrohen në tre fusha, ku më e rëndësishmja është ajo e krijimit të një qeverie të unitetit kombëtar.
“Të dielën do të donim t’i kishim gati tre dokumentet, e të publikoheshin nëse është e mundur, si pjesë e një pakete përfundimtare,” u shpreh Leon.
Vendi ka njohur një polarizim të skajshëm që kur Gadafi u rrëzua nga pushteti dhe u vra më tepër se tre vite të shkuara, me përplasje mes grupeve të armatosura.
Libia nuk ka qenë në gjendje që prej rënies së regjimit të Gadafit të ketë një ushtri kombëtare dhe të ndërtojë institucione shtetërore efektive, dhe tani gjendet nën pushtetin e ish-brigadave rebele, që nuk bien në një mendje mbi mënyrën e qeverisjes së Libisë.
Eshtë milicia që i kontrollon përgjithësisht tre qytetet më të mëdha të Libisë, Tripolin, Bengazin dhe Misratën, ndërsa më shumë se 400.000 njerëz janë detyruar të zhvendosen për shkak të luftimeve. /tesheshi.com/
