Nga Mensur Krasniqi
“Kanta (Shporta) Pazari”, kështu quhet vendi për të cilin thuhet që “ka gjithçka, vetëm babë e nanë s’ka!”. Ky pazar tashmë një vit e gjysmë është zhvendosur nga qendra e Shkupit për në periferi të po këtij qyteti.
Pse “Kanta(Shporta)- Pazari”?
Sipas disa nga shitësit më të vjetër në këtë pazar, ky emër ka mbetur i tillë që nga koha kur shiteshin vetëm gjëra të vjetra, të cilat konsideroheshin të panevojshme për shtresën më të lartë të qytetarëve, ndërsa të volitshme për shtresën më të ulët sipas gjendjes sociale.
Andaj gjitha gjërat, duke filluar nga rrobat e deri te mjetet elektrike, dhe të tjera që nuk i hynin në punë familjeve më të pasura, shitësit i mbledhnin dhe i nxjerrnin në këtë pazar për t’i shitur me një çmim simbolik.
Mirëpo tani ky pazar që dikur vizitohej vetëm nga zorri, sot është shndërruar si një qendër tregtare ku mund të blehet çdo gjë.
Ndonëse më shumë mbizotërojnë gjërat e vjetra, në të ka edhe shumë gjëra të reja për t’u blerë.
Si ndryshoi lloji i pazarit?
Njeriu kur ndodhet në vështirësi financiare, ndodh që të shesë edhe më të shtrenjtën për të mbijetuar. Andaj në këtë mënyrë qytetarët shpesh herë janë detyruar që të nxjerrin në treg për shitje gjësendet e reja shtëpiake për të siguruar kafshatën e gojës. Sa më shumë që shtohej kriza financiare tek qytetarët, aq më tepër pasurohej “Kanta(Shporta) Pazari” me artikuj të reja.
Më të shpeshta janë rastet kur qytetarët kanë pranuar për dhuratë gjëra të shtrenjta nga familjarët në kurbet, dhe të njëjtat dalin i shesin në këtë pazar me justifikimin se nuk iu janë qëlluar për trupin e tyre, apo se ndodhen në ndonjë krizë momentale financiare.
Po ashtu, thuhet që nëse ndokujt i ka humbur ndonjë gjë, apo ia kanë vjedhur, të mëdha janë gjasat që e njëjta të gjendet në duart e ndonjë shitësi në këtë pazar.
Ndodh që blerësi të çuditet me çmimet e ulëta të produkteve me markë të shtrenjtë, por këtë e bën urgjenca e shitjes në mënyrë që të hiqet sa më shpejtë malli i vjedhur nga duart e vjedhësve.
Gjërat më të mira dhe më të lira të pazarit blihen në orët e herëta të mëngjesit, edhe atë nga vetë shitësit tjerë, të cilët më pas gjërat e njëjta i shesin me çmim më të lartë.
Ndryshe ky pazar punon çdo të martë dhe të premte nga ora 6 e mëngjesit deri në drekë.
Po edhe përkundër shitblerjes ilegale të gjërave, pa letër fiskale, dhe shpesh herë të vjedhura, nuk dihet që ndonjëherë policia të ketë intervenuar për ta mbikqyrur punën e tyre. /tesheshi.com/
