Njerëzit kanë personalitet dhe një pjesë e madhe e tyre mund të thonë se edhe kafshët që mbajnë në shtëpi kanë personalitet, duke iu referuar mënyrës së tyre të të sjellurit dhe të reaguarit. Por, çfarë mund të themi për kafshët e egra?
Në dy studime të kryera, shkencëtarët janë përpjekur të kuptojnë nëse peshkaqenët kanë personalitet apo sillen në mënyrë të njëjtë në të gjitha rrethanat.
Kërkuesit e University of Exeter në Britaninë e Madhe kanë vëzhguar mënyrën e ndërveprimit mes gjuetarëve të peshkaqenëve dhe peshkaqenëve, në tre habitate të ndryshme.
Edhe pse numri i peshkaqenëve në grupe ndryshonte, shkencëtarët vunë re se ata që ishin të lidhur mes tyre, i shmangnin peshkaqenët që ishin jo socialë, pavarësisht habitatit ku ndodheshin.
Në vitin 2015, një studim i publikuar në Journal of Fish Biology, u mundua të vërente tipare të personalitetit të peshkaqenëve, bazuar në dy teste. Testi i patë i vendosi peshkaqenët që ndodheshin në Port Jackson, përpara një muri të vogël, i cili kushtëzoi habitatin e tyre dhe më pas u lanë të lirë të lundronin në ujë të hapur.
Në testin e dytë kërkuesit arritën të stresonin peshkaqenët duke i nxjerrë ata nga uji për 60 sekonda. Më pas ata matën nivelin e tyre të ankthit duke numëruar sa herë në minutë do ta përplaste secili prej peshkaqenëve bishtin në ujë, pasi të ktheheshin në habitatin normal.
Në të dyja testet peshkaqenët u sollën në mënyra të ndryshme. Disa prej tyre treguan guxim që në fillim dhe thyen murin në testin e parë, ndërsa të tjerë ishin “në dyshim” për rreth 20 minuta.
Njohja më shumë rreth mënyrës së sjelljes së peshkaqenëve mund të ndihmojë shkencëtarët për të kuptuar më mirë gjithçka në lidhje me evoluimin e specieve dhe habitatet e tyre. /tesheshi.com/
