Në një shpalosje programi për reformimin e PD-së, kandidatja për kryetare e saj, ish-zv.ministrja e Jashtme e Edit Harxhi, pretendon se kjo forcë nuk është e anëtarëve respektivë dhe se ajo, pra PD nuk i shërben interesit qytetar.
“Partia Demokratike t’iu kthehet anëtarëve të saj dhe t’i shërbejë interesit qytetar”, thuhet nga Harxhi në pikën e parë të vizionit të saj reformues.
Ngjan kjo me slloganin dogmatit të Bashës në raport me qeverinë, ku dhe ai thoshte se me të kryeministër, “qeveria do u kthehej qytetarëve”.
Në pikat e tjera të znj. Harxhi thuhet:
- Të vendosen debati dhe konkurrenca e lirë brenda Partisë;
- T’i jepet fund emërimeve nga ana e Kryetarit apo Kryesisë së Partisë;
- Të mundësohet decentralizimi dhe autonomia e degëve të Partisë nëpër qarqet e vendit.
- Të ndodhë bashkimi i Partisë rreth vlerave dhe parimeve të djathta dhe rikthimi i çdo personalitetit e kontribuesi, që prej themelimit të Partisë dhe atyre që e konsiderojnë Partinë Demokratike shtëpinë e tyre. Kështu, do të arrijmë një ringritje, bashkim dhe forcim të së djathtës shqiptare;
- Të pranohen të rinjtë shqiptarë dhe kontributi, idetë dhe vizioni i tyre të jenë pjesë e programit qeverisës. Forumi Rinor dhe Lidhja Demokratike e Gruas duhet të ketë të drejta si gjithë anëtarësia e Partisë dhe anëtarët e FRDP-së dhe LDGSH-së të jenë anëtarë partie. Në kohën e inteligjencës artificiale, idetë e reja dhe vizioni për të ardhmen duhet të jenë pjesë e rëndësishme e Partisë Demokratike.
- Gjithashtu, Partia duhet të ketë një Akademi Politike funksionale, e cila do të trajnojë brezin e ri të politikanëve të djathtë.
- Të pranohen të gjithë anëtaret e Lidhjes Demokratike të gruas anëtare me të drejtë vote të barabartë si gjithë anëtarët e tjerë të Partisë. /tesheshi.com/
