Norbert Hofer, përfaqësuesi i së djathtës ekstreme në zgjedhjet e përsëritura presidenciale që do të zhvillohen në Austri më 4 dhjetor, nuk e ka përjashtuar mundësinë e një referendumi mbi të ardhmen e vendit në BE.
Hofer, që aspiron të bëhet presidenti i ardhshëm i Austrisë, i ka deklaruar BBC-së se dëshironte një Bashkim Europian më të mirë, e se vota për të nuk do të ishte një e tillë për nxjerrjen e vendit nga blloku, apo një “Oexit”.
Veçse ai e ka pranuar se do kërkonte një referendum për anëtarësinë në BE nëse unioni do të bëhej më i centralizuar pas Brexit-it.
“Po qe se përgjigjja ndaj Brexit-it do të jetë krijimi i një Europe të centralizuar, ku parlamentet kombëtare të zhvishen nga fuqia dhe unioni të qeveriset si një shtet, në këtë rast do duhet të mbajmë një referendum në Austri, se kjo do të çonte në një ndryshim kushtetues.”
Kandidati i ekstremit të djathtë i humbi me një diferencë të vogël votash zgjedhjet në maj, ndërsa gjykata vendosi për përsëritjen e tyre pas ankesave për parregullsi. /tesheshi.com/
