Kandidati për kryeminisitër i Kosovës nga LDK-AKR-Alternativa, Avdullah Hoti, nuk ka mundur ta kalojë të gjithë Urën e Ibrit, atë që ndan Mitrovicën në dy pjesë dhe që është bërë simbol i karshillëkut dhe i sfidës së hapur serbe ndaj shtetit të Kosovës.
Hoti ka shkuar vetëm deri te gjysma, pra jo edhe në pjesën veriore e banuar me serbë, por ka premtuar se “si kryeministër do ta vizitojë pjesën veriore të Mitrovicës”
“Me përkrahjen e madhe të partnerëve tanë nga Bashkimi Evropian dhe nga SHBA-të, së shpejti kjo urë do të bashkojë qytetarët e dy anëve të Mitrovicës, për lëvizje të lirë. Do t’i shfrytëzojmë të gjitha resurset që kemi dhe do të punojmë shumë edhe në qeverinë e ardhshme që veriun e vendit ta integrojmë në sistemin institucional dhe ekonomik të vendit”, ka thënë Hoti.
Ai ka shtuar se veriu i vendit tanimë është integruar plotësisht, institucionet shtetërore funksionojnë në gjithë territorin e Kosovës, përfshirë doganën, Administratën tatimore, organet e rendit dhe të ligjit.
“Do të punojmë shumë me komunitetin serb, për t’i integruar plotësisht, sepse ata janë qytetarë të barabartë të vendit. Do të shfrytëzojmë gjithë autoritetin që kemi institucional për t’i bërë ata që të ndjehen mirë në shtetin e Kosovës. Kemi një Fond Zhvillimor që i ndihmon veriut për të investuar në infrastrukturë arsimore, shëndetësore etj”, ka thënë Hoti, i cili në këtë vizitë shoqërohej edhe nga ministri i Kulturës, Rinisë dhe Sportit, Kujtim Shala.
Hoti ka theksuar se me padurim pret që në bashkëpunim me autoritet komunale në dy anët e Ibrit ta promovojmë urën si një simbol i bashkimit dhe qarkullimit të lirë të qytetarëve. /tesheshi.com/
