Dështimi i vendosjes në ligj për të ndaluar njerëzit me rekorde kriminale që të kandidojnë më 21 qershor, ka alarmuar sërish ndërkombëtarët. Ditën e hënë pritet që të zhvillohet një takim i ambasadorëve të SHBA dhe të vendeve të Bashkimit Europian për të bërë të ditur një qëndrim më të ashpër në lidhje me mospërfilljen e mesazhit të Uashingtonit dhe Brukselit.
Siç mësohet nga burime diplomatike, takimi do të mbahet në selinë e ambasadës së Bashkimit Europian në Tiranë, nga ku sipas të gjitha gjasave do të dalë një deklaratë e përbashkët. Ndërkohë Komisioni Qendror i Zgjedhjevka shtyrë afatin e regjistrimit të kandidatëve deri të hënën në darkë dhe sipas gjasave afati mund të shtyhet edhe dy ditë të tjera, pra deri të mërkurën.
Ditën e enjte në Kuvend, deputeti Taulant Balla, propozoi që të miratohet një amendament në Kodin Zgjedhor ku të mos kandidojnë ata njerëz që janë dënuar nga gjykatat shqiptare apo të huaja, por kjo u cilësua si spekullim nga deputeti i PD-së Oerd Bylykbashi, i cili theksoi se do të duhet të miratohet amendamenti i PD-së sipas të cilit duhet të firmoset nga formular nga të gjithë kandidatët të cilët duhet të deklarojnë se nuk kanë rekorde kriminale dhe nëse nuk thonë të vërtetën të dënohen.
Por në fund nuk është miratur asgjë dhe njerëz të inkriminuar kanë depërtuar jo vetëm në listat për kryetarë bashkish, por edhe këshilltarë, të cilat gjithsesi ende nuk janë dorëzuar. Siç mësohet, ndërkombëtarët pritet që të bëjnë publike listët e kandidatëve me problem nëse nuk ka reflektim nga politika. Ka gjasa, që kjo listë të shpërndahet nga rrjeti i organizatave jo qeveritare të cilat janë mbështetur nga SHBA dhe BE për të qenë vëzhguese të zgjehdjeve vendore të 21 qershorit.
Gjatë takimit me organizatat jo qeveritare një javë më parë, ambasadori i SHBA ë Tiranë, Donald Lu, deklaroi se “Premtuam se do të shqyrtonim listat e kandidatëve për emra personash që kanë qenë të arrestuar apo të dënuar për krime të rënda qoftë në Shqipëri ose vende të tjera. Në përgjithësi ndihemi mirë për listat, veçanërisht nga një numër i madh kandidatësh gra të aftë, por kemi identifikuar disa emra personash me histori të mundshme kriminale dhe jemi duke diskutuar me udhëheqësit e tyre politikë”.
SHBA do të investojë 500 mijë dollarë me qëllim që zgjedhjet e 21 qershorit të jenë të lira e demokratike.
/tesheshi.com/
