Kandidatja demokrate për Shtëpinë e Bardhë, Hillary Clinton shfrytëzoi një deklaratë të rivalit republikan, Jeb Bush për ta akuzuar për tërheqjen e trupave amerikane nga Iraku. Situata në Irak dhe tërheqja e trupave amerikane, që konsiderohet se la pas destabilitet, kanë qenë fokus replikash në tubimet elektorale të kandidatëve.
Republikani Bush akuzoi administratën Obama për “tërheqje të parakohshme nga Iraku në vitin 2011, që pati sipas tij, kosto të dhimbshme. Clinton i është kundërpërgjigjur duke thënë se ishte vëllai i tij, George Bush që si president, negocioi tërheqjen amerikane.
Lufta e 2003 në Irak u pasua me vite të tëra trazirash. Bush e cilësoi tërheqjen e trupave amerikane në 2011 si një gabim fatal, që destabilizoi kombin dhe hapi rrugën për rritjen e militantëve të Shtetit Islamik.
“Kaq të etur për të qënë shkrues të historisë, ata dështuan të jenë paqebërës”, tha Bush, duke iu referuar presidentit Obama dhe ish-sekretares së tij të Shtetit, Hillary Clinton.
Korrespondentët thonë se këto akuza i erdhën përshtat Hillary Clinton e cila është edhe kandidate kryesore e demokratëve për nominimin brenda partisë.
Sa më shumë që ajo të përplaset me republikanët, thonë analistët, aq më shumë mbështetës demokratë mund të mbledhë rreth vetes. /tesheshi.com/
