Unioni Kristiandemokrat (CDU) pësoi një tjetër humbje në zgjedhjet rajonale, duke regjistruar këtë herë në Berlin rezultatin e tij më të keq.
Vetëm 17.6 për qind të votave arriti të marrë partia e kancelares Angela Merkel. Një rezultat tejet negativ në zgjedhje, që pason humbjen e dy javëve më parë.
Socialdemokratët e SPD-së dolën kryesues në këto zgjedhje, me 21.6 për qind të votave, edhe pse kanë humbur thuajse 7 për qind të votuesve.
Përndryshe, AfD-ja, Alternativa për Gjermaninë, ka vijuar të fitojë terren, ndërsa me 14.1 për qind të votave pritet të hyjë për herë të parë në parlamentin rajonal të kryeqytetit gjerman.
Humbja e Merkel-it i dedikohet politikës së saj së dyerve të hapura për refugjatët, një politikë që ajo e ka mbrojtur në mënyrë të vazhdueshme.
Kjo humbje e vë në dyshim vazhdimësinë e Merkel-it në qeverisjen e vendit. Humbjet në zgjedhjet rajonale janë sinjalet e para të një humbjeje të mundshme në zgjedhjet e ardhshme të përgjithshme në Gjermani. /tesheshi.com/
