Nën masa të rrepta sigurie, me helikopterë të ushtrisë që patrullonin në ajër e me anije të flotës ushtarake-detare që mbikëqyrnin nga afër, gjashtë anije përshkuan dje Kanalin e ri të Suezit, i cili do të inaugurohet zyrtarisht më 6 gusht.
Tre anije kaluan nga hyrja veriore e kanalit, pra, nga Mesdheu, e tre të tjerat nga hyrja jugore, domethënë, nga Deti i Kuq.
Këto ishin provat e para në këtë kanal njëmbëdhjetë muaj pasi ushtria egjiptiane nisi ndërtimin e tij përbri kanalit të vjetër 145-vjeçar.
Muhab Memishi, kryetari i Autoritetit të Kanalit të Suezit, e cilësoi një sukses këtë provë të parë.
Kjo rrugë e re detare synon ta kthejë zonën rreth Kanalit të Suezit në një qendër tregtare dhe industriale. Zyrtarët egjiptianë deklarojnë se ky projekt do t’i shtojë të ardhurat e shtetit nga Kanali i Suezit, nga 5.3 miliardë dollarë në vit që janë aktualisht, në 13 miliardë dollarë për të njëjtën periudhë kohore.
Sipas Memishit, ky kanal do ta zvogëlojë kohën e lundrimit për anijet nga rreth 22 orë në 11 orë, duke e shndërruar atë në më të shpejtën rrugë të tillë ujore në botë.
Në Kanalin e ri të Suezit, 72 kilometra të gjatë, do t’u mundësohet kalimi anijeve më të mëdha, dhe trafiku do të jetë i mundur në të dy drejtimet.
Kanali i Suezit është një nga udhët detare më me trafik në botë, e po ashtu është burimi kryesor i të ardhurave të Egjiptit. /tesheshi.com/
