Qeveria kanadeze e ka përmbushur dy ditë para afatit të vënë nga vetë ajo zotimin për të marrë 25.000 refugjatë sirianë gjer në fund të shkurtit.
E shtuna ka qenë dita kur në Montreal ka zbritur avioni që sillte refugjatët e fundit sirianë që plotësonin këtë numër.
Kryeministri i vendit, Justin Trudeau, pati premtuar në fushatë gjatë 2015-ës se bartja e 25.000 refugjatëve drejt Kanadasë do të përfundonte në fund të vitit, por afati kohor u shty me dy muaj për shkak të zgjedhjeve.
Rreth njëqind fluturime ka patur nga Libani dhe Jordani, nga kampet e refugjatëve sirianë, drejt Kanadasë që nga dhjetori, kur edhe nisi ardhja e refugjatëve.
Programi risistemues i qeverisë do të mbulojë shpenzimet e gjysmës së refugjatëve për vitin e parë të qëndrimit të tyre, ndërsa grupe private do të kontribuojnë për pjesën tjetër, siç bëjnë të ditur autoritetet kanadeze të emigracionit.
Mbërritja e refugjatëve të tjerë sirianë në Kanada do të vijojë, por me një ritëm më të ulët. Qeveria shpreson që numri i tyre të arrijë nga 35.000 në 50.000 në fund të vitit, por shifra e saktë nuk është përcaktuar ende.
Kanadaja është një prej shteteve që po merr vullnetarisht refugjatë sirianë, duke i risistemuar dhe duke u siguruar kushte shumë të përshtatshme jetese. /tesheshi.com/
