Një aksident i tmerrshëm ka ndodhur në Kanada, kur autobusi i një ekipi hokey-t në akull është përplasur me një kamion duke shkaktuar vdekjen e 14 lojtarëve, të gjithë në moshë të re.
Autobusi po udhëtonte në autostradën 35 në veri të Tisdale në provincën e Saskatchewan.
Policia Mbretërore Kanadeze tha se 28 vetë ishin në autobus, 14 prej të cilëve vdiqën, duke përfshirë edhe shoferin. 14 të tjerë në bordin e autobusit janë dërguar në spital. Tre janë në gjendje kritike.
Në një twitt, kryeministri kanadez Justin Trudeau shkroi: “Nuk mund ta imagjinoj atë që po kalojnë këta prindër”.
Inspektori i Policisë Mbretërore Kanadeze, Ted Munro tha se operacioni i shpëtimit po vazhdon dhe ata kishin ngritur një qendër informacioni dhe mbështetjeje për familjet.
“Ngushëllimet dhe lutjet tona janë me familjet sonte”, tha ai.
Myles Shumlanski, babai i një prej lojtarëve të Broncos, arriti në vendin e ngjarjes pas një thirrjeje nga djali i tij.
“Ishte një fatkeqësi e tmerrshme”, tha ai. “Përdorëm një vinç për të ngritur autobusin”.
Presidenti i ekipit, Kevin Garinger lëshoi një deklaratë ku shprehte dhimbjen e të gjithëve për këtë katastrofë.
“O Zot, është një aksident i tmerrshëm. Prindërit janë në ankth dhe presin lajme për fëmijët e tyre. Do presim më pas rezultatet e hetimeve. Por nuk di ç’them jam i shokuar”. /tesheshi.com/
