Pas muajsh konsultime, përfaqësuesit e qytetit të Londrës në Ontario të Kanadasë kanë paraqitur një plan veprimi që synon të luftojë Islamofobinë në nivel lokal.
Plani vjen pas sulmit me makinë që ndodhi më 6 qershor të vitit të kaluar, i cili pati në shënjestër një familje muslimane, e cila kishte dalër për një shëtitje.
Salman Afzaal, 46 vjeç, Madiha Salman, 44 vjeç, vajza e tyre 15-vjeçare Yumna dhe gjyshja e saj 74-vjeçare, Talat Afzaal, u vranë në sulm. Djali nëntë vjeçar i çiftit, Fayezi, mbeti i plagosur rëndë, por mbijetoi.
Sulmi, të cilin policia e ka cilësuar si krim për shkak të urrejtjes, shënoi vrasjen masive më vdekjeprurëse në historinë e Londrës dhe ndezi debate në shkallë kombëtare mbi rrezikun e islamofobisë.
Plani, i cili mund të shihet i plotë në webfaqen e qytetit, paraqet dhjetëra rekomandime për qytetin e Londrës, organizatat komunitare dhe organizatat e sektorit publik.
Lista bazohet në 61 rekomandimet e paraqitura nga Këshilli Kombëtar i Myslimanëve Kanadezë përpara samitit kombëtar të qeverisë federale mbi islamofobinë të mbajtur korrikun e kaluar.
Disa nga pikat kryesore përfshijnë zhvillimin e një akti të ri nënligjor për shqetësimet publike, i cili kërkon të trajtohen ngacmimet në rrugë dhe “sulmet verbale për shkak të urrejtjes”, krijimin e një këshilli që t’i kërkojë llogarit qytetin dhe të punojë për të kujtuar përvjetorin e sulmit të 6 qershorit.
Drejtoresha kundër racizmit dhe shtypjes, Rumina Morris, thotë se plani kërkon të luftojë islamofobinë përmes një qasjeje sistematike.
“Ngacmimi në rrugë, ose ajo që ne këtu në Londër e quajmë Akti Nënligjor i Shqetësimit Publik, është një shembull i mirë. Kështu që kur përjetoj diçka në terren, unë kam një sistem që mund ta mbështesë atë pjesë. Si ta zhvendosim atë narrativë, në mënyrë që të mos pranohen më ose të mos lejohen të bëhen ato lloj gjërash?”, tha Morris.
Një shembull tjetër është gjetja e formave më gjithëpërfshirëse për të planifikuar ngjarje për qytetin, si përshembull krijimin e kushteve për kohët e lutjes (namazit) gjatë konferencave që zgjasin gjithë ditën.
“Kjo (qasje) ka qenë ajo që ka kërkuar komuniteti dhe është në përputhje me mënyrën se si ne e bëjmë këtë lloj pune,” tha Morris.
Plani vjen pas muaj konsultimesh me palët e interesuara në nivel lokal, duke përfshirë ata në komunitetin musliman, një grup që Morris tha se ndihej i lënduar, i frikësuar, i zemëruar, i frustruar dhe i dëshpëruar për të bërë diçka në të gjitha nivelet e qeverisë.
Zyrtarët e qytetit gjithashtu donin të shmangnin paraqitjen e komunitetit mysliman si një zë monolit dhe zbuluan se shumë të rinj muslimanë ndjenin se po shpërfilleshin, diçka që zyrtarët e qytetit shpresojnë ta riparojnë duke shtuar përfaqësimin e të rinjve në këshillin lokal që synon të mbajë qytetin përgjegjës.
“A ndihen njerëzit më të sigurt si rezultat i kësaj? – Jo. Por, për mua ky është vetëm fillimi,” përfundoi Morris. /tesheshi.com/
