Kreu i Guarda di Finanza-s, Giorgio Toschi ka konfirmuar uljen drastike e sasisë së mbjellë me kanabis në territorin shqiptar, e njëherësh ka kërkuar që monitorimi nga ajri të zhvendoset te fqinjët, pasi janë shfaqur tendenca kultivimi e trafikimi pikërisht në këto vende. Kështu thuhet në një njoftim të Ministrisë së Rendit, ku pasqyrohet një takimi mes zyrtarit të lartë të policisë italiane, me minstrin Xhafaj.
“Toschi konfirmoi zhvendosjen e tentativave për trafikim, në shtetet fqinje të Shqipërisë dhe shprehu interesin e GdF që, në të ardhmen, të shtrijë monitorimin ajror edhe drejt këtyre vendeve”, thuhet në njoftim.
“Komandanti i GdF nënvizoi se gjatë këtij viti, në territorin shqiptar janë mbjellë një numër edhe më i vogël bimësh kanabisi se në vitin 2017, që ishte viti më i suksesshëm në luftën kundër kanabisit”, thekson deklarata.
Siç dihet, Guarda di Finanza është karta më e fortë e qeverisë shqiptare ndaj akuzave për kanabizimin e vendit. Është kjo strukturë që monitoron nga ajri aktivitetin e kultivimit të kanabisit, e që sipas shifrave të saj, të cilat i ofron rregullisht qeveria, treguesit e terrenit janë ndryshe nga ato perceptimet e krijuara në opinion. /tesheshi.com/
