Policia ka zbuluar një linjë trafikmimi kanabisi nga Shqipëria drejt Maqedonisë Veriore, duke përdorur mushkat për transport. E kjo në zonat e thella të Librazhdit, në kufi me shtetin fqinj.
“Dy persona janë vënë në prangat e policisë së Elbasanit në saj të operacionit ‘Rrajca’ pasi po transportonin rreth 55 kilogramë kanabis me mushkë drejt Maqedonisë. Të arrestuarit janë – A. B., 47 vjeç, dhe I. B., 22 vjeç, të dy banues në fshatin Sutaj-Prrenjas.
Arrestimi i tyre është bërë gjatë mbrëmjes së djeshme në orën 21:30 në fshatin Rrajcë-Sutaj ku të dy të arrestuarit po tentonin të kalonin drejt Maqedonisë nëpërmjet kufirit të gjelbërt. Sipas policisë këta dy persona kanë bashkëpunuar me të tjerë për trafikun e drogës. Policia kishte marrë informacione për këtë grup dhe në fund ka realizuar me sukses arrestimin e dy trafikantëve.
Tashmë ata do të përballen me akuzën për veprën penale ‘Trafikimi i narkotikëve e kryer në bashkëpunim, e mbetur në tentativë’, thuhet në njoftimin zyrtar të policisë.
Trafiku i kanabisit me kafshë nuk është diçka e re. Edhe në epokën “Lazarat”, lënda narkotike transportohej dhe rrugë mali ngarkuar në mushka, duke kapërcyer Sopotin e dalë në Sarandë, ku më pas vijonte rruga drejt Greqisë me mjete të tjera. /tesheshi.com/
