E veçanta e provave zyrtare të së shtunës nuk ishte renditja e pilotëve në fund të tyre, që ndoqi të njëjtin rregull të vitit të shkuar, por pista e boshatisur në minutat e fundit për shkak të formulës së re të zhvillimit.
Në pistë nuk kishte thuajse asnjë makinë në mbyllje të provave zyrtare, ndërsa pamja nuk kishte asnjë lidhje me atë klasiken. Një pjesë e makinave bënë vetëm nga një xhiro, e as u munduan fare të dalin më tej, duke e lënë në heshtje pistën e Melburnit.
Kritikat për formatin e provave kanë nisur menjëherë, me zërat që kërkojnë kthimin te skema e vjetër.
Gjermani Rosberg deklaroi pas provave zyrtare: “Eshtë mirë të provosh diçka, por nuk ka funksionuar,
prandaj duhet të kthehemi prapa.”
Akoma më i drejtpërdrejtë gjermani tjetër, Vettel, i cili nuk u kursye në kritikën e tij: “Nuk shoh arsye pse gjithkush u habit që nuk funksionoi. Njerëzit duan të na shohin të shkojmë në limit në fund të sesionit. Kjo është mënyra e gabuar për të vazhduar, e kjo është ajo çka ne thamë.”
Sa u përket provave dhe renditjes për ditën e nesërme të garës, Hamilton u rendit sërish i pari, i pakërcënuar për asnjë moment nga ndonjë pilot tjetër. Shoku i tij i skuadrës, e po ashtu dhe rivali më i madh, Rosberg, do të jetë i dyti nesër në vijën e nisjes.
Në linjën e dytë pasojnë dy pilotët e Ferrari-t, Vettel dhe Raikkonen. Pas tyre do të jetë Max Verstappen i Toro Rosso-s dhe Felipe Massa i Williams-it.
Nuk bënë përsëri figurë të mirë dy makinat e McLaren-it. Alonso dhe Button zunë përkatësisht vendin e 12-të dhe të 13-të.
Gara e nesërme e Melburnit është e para e këtij sezoni të F1-shit. /tesheshi.com/
