Finalja e madhe e “Super Sfida”, e cila u transmetua mbrëmë në RTK, ishte një show i jashtëzakonshëm që kishte dramë, tension, humor, ku gara nuk mungoi deri në lojën e fundit.
Në finale, në një duel të madh u ndeshën ekipi “Shqiponjat” kundër ekipit “Prishtinalitë”. Ekipi “Shqiponjat” përbehej nga Gold Ag, Leonora Jakupi dhe Meda, ndërsa për ekipin “Prishtinalitë” garuan Alban Mehmeti, Robert Berisha dhe Yllka Kuqi. Të gjithë mysafirët ishin yje të cilët janë në kulmin e famës së tyre si artistë dhe të cilët treguan edhe shpirtin garues në lojëra jo të zakonshme.
Moderatori dhe producenti, Enis Ujkani, sqaroi gjatë emisionit se në këtë edicion janë kujdesur që të mos vendosin lojëra të cilat, për shkak të garës së fortë dhe tensionit, do të mund t’i rrezikonin mysafirët të kenë lëndime eventuale, duke shtuar se ky kujdes ka ardhur për faktin se kur e dimë se jemi në finale dhe fitorja është më afër se kurrë, “secili mysafir nuk kursehet që të bëhet edhe pjesë e lojërave që janë spektakolare”.
Loja e parë “hokej” ishte shumë e ashpër, sidomos dueli në mes Gold Ag dhe Robertit, ku dhe i thyen shkopinjtë në mes lojës dhe u lënduan në duar dhe këmbe, gjë që i detyroi organizatorët ta ndërrojnë lojën.
Në lojën e dytë “Top Top”, ekipi “Shqiponjat”, kaluan në epërsi prej pesë pikësh dhe nga loja e tretë vazhduan në epërsi ekipi “Prishtinalitë”, epërsi që vazhdoi deri në lojën e fundit “futboll symbyllas”, ku në raundin e parë Leonora Jakupi e barazoi rezultatin. Raundin e dytë Gold Ag e fitoi dhe kaloi në epërsi, ndërsa në raundin e tretë, Meda fitoi dhe mbrojti fitoren.
Kështu ekipi “Shqiponjat” fituan Kupën e “Super Sfida 2016” dhe veturën fringo të re Dacia Sanderote, që e dhuroi “Auto Mita”. /tesheshi.com/
