Juventusi arriti për herë të dytë brenda tre sezonesh në finalen e Champions League-s. Fitorja 2-1 e së martës ndaj Monakos iu bashkangjit asaj 0-2 javën e shkuar ndaj së njëjtës skuadër, duke i dhënë ekipit të Torinos të drejtën për ta provuar përsëri fitimin e trofeut.
Ky trofe i Champions League-s është i paarritshëm prej vitit 1996, ndërsa Juventusi dështoi ta bëjë të tijin dy vite më herët, kur u mund në finale nga Barcelona.
Në reagimin e tij pas ndeshjes, Allegri deklaron se e sheh këtë sezon si të duhurin për fitimin e Champions-it.
“Ne jemi në finale dhe duhet të përpiqemi ta fitojmë atë. Shpresoj se ky është viti i duhur. Mendoj se Juve ka një mundësi shumë të mirë për ta fituar Champions League-n.”
“Nuk mund të them se Juventusi nuk e meritoi të kualifikohej,” është shprehur trajneri i Monakos, Leonardo Jardim.
“Mendoj se Juventusi është më i fortë tani nga ç’ishte në 2015-n. Përforcimet e reja kanë më shumë përvojë, dhe ky mund të jetë një element shumë i rëndësishëm në finale.”
Për Buffon-in, një prej më të dalluarve te Juventusi, edhe pse më veterani, trofeu i Champions League-s është i vetmi që ai nuk e ka fituar, ndërsa nuk e ka besuar dy vite të shkuara se do të luajë sërish në finale.
“Dy vite të shkuara, çdokush mendonte se kjo ishte finalja ime e fundit e Champions League-s, dhe unë mendoja gjithashtu, por ju duhet të vazhdoni të besoni në ëndrrat tuaja.”
“Kjo është një mbrëmje që nuk do ta harroj kurrë,” ka thënë Dybala. “Eshtë një mbrëmje e mrekullueshme për çdokënd. Duam të fitojmë në finale. Shpresoj të jem vendimtar në fitoren e ekipit tim.”
Mbrëmjen e kësaj të mërkure do të mësohet dhe emri i kundërshtarit që do të ketë përballë Juventusi në finalen e 3 majit në Kardif. Reali i Madridit është më i avantazhuar me fitoren 3-0 të gjysmëfinales së parë, por Atletiko e Madridit është e sigurt se do të provojë të bëjë gjithçka sonte për të qenë prapë në finale. /tesheshi.com/
