Takimi i fundit i javës së tretë të kampionatit francez ka sjellë një rezultat deri diku të papritur, ndërsa Monako ka fituar bindshëm ndaj Paris Sent-Zhërmenit.
Skuadra e kryeqytetit francez, PSG-ja, do ta mbyllte kampionatin e shkuar me një dominim të plotë, duke humbur vetëm në dy takime e duke kryesuar e shkëputur së tepërmi nga kundërshtarët. Me titullin të fituar në katër sezone radhazi, PSG-ja qe bërë e pathyeshme në futbollin francez, duke fituar thuajse gjithçka.
Por largimi i trajnerit, Laurent Blanc, si dhe i lojtarit më të mirë të skuadrës, Zlatan Ibrahimovic-it, duket se kanë lënë pasoja te kampionët.
Monaco fitoi mbrëmë 3-1. Do të shënonte së pari Moutinho, me rezultatin që do të thellohej në përfundim të pjesës së parë nga Fabinho. Cavani do ta rifuste në lojë ekipin e tij me një gol të minutës së 61-të, ama autogoli i Aurier-it dhjetë minuta para mbarimit të lojës do të vuloste fitoren e vendasve.
PSG-ja ka kështu 6 pikë pas tre javësh kampionat, në vend të pestë aktualisht. Formacioni nuk ka pësuar shumë ndryshime, veçse Cavani nuk duket se mund ta mbyllë boshllëkun e lënë nga Ibrahimovic në qendër të sulmit. Unai Emery, një trajner i suksesshëm me Seviljen, shpresohet të jetë i tillë dhe me kampionët e Francës, por ngjan se do ta ketë më të vështirë se paraardhësi.
Çfarë mund të thuhet pas ndeshjes së mbrëmshme është se Paris Sent-Zhërmeni nuk do të ketë më të njëjtin dominim si një sezon më parë. /tesheshi.com/
