Interi i Milanos u është kthyer ditëve të veta më të mira. Pas shumë sezoneve katastrofike, interistët kanë nisur sërish të shpresojnë për fitimin e titullit.
Merita për këtë i takon pa dyshim Mançinit, trajnerit simpatik që kërkon edhe një herë të përsërisë sukseset e mesit të viteve 2000 me të njëjtën skuadër. E ndonëse skuadra që fitoi Champions League-n vite të shkuara nuk ka më Diego Militon në radhët e saj, atë e ka zëvendësuar një tjetër argjentinas, Ikardi, që sa vjen e po rritet në lojën e vet.
Interi fitoi mbrëmë në fushën e Udinezes, në një ndeshje të mbizotëruar prej tij e të mbyllur me një rezultat të thellë, 0-4, për të.
Rezultati do të zhbllokohej shpejt, ndërsa Ikardi shënon në minutën e 23-të. Të çliruar tashmë nga presioni, miqtë nga Milanoja e gjejnë përsëri rrjetën tetë minuta më pas me Jovetiçin.
Me pjesën e dytë të luajtur kujdesshëm nga lojtarët e Interit, në minutat e fundit vijnë dy gola të tjerë, njëri i shënuar po nga Ikardi, e tjetri nga Brozoviç.
Me këtë fitore Interi vijon të mbajë vendin e parë në klasifikimin e Serisë A, i shkëputur katër pikë nga Fiorentina e vendit të dytë. Ndërkaq, interistët presin me kërshëri se si do t’u vejë halli sonte pretendentëve të tjerë për titull. Napoli do të luajë ndaj Romës në orën 18:00, kurse Juventusi ndeshet me Fiorentinën në 20:45.
Sido që të jetë përfundimi i këtyre takimeve, Interi do të vazhdojë të jetë në krye të kampionatit italian. /tesheshi.com/
