Dalëngadalë po i vjen fundi sezonit futbollistik në Europë. Pak javë kanë mbetur në shumë prej kampionateve, për t’u luajtur gjithashtu dhe ca finale kupash. Më në dilemë mbetet fituesi i kampionatit spanjoll, ku Reali e Barcelona janë kokë më kokë, kurse në kampionatet e tjera elitare situata është më e kthjellët.
Në Premier League, Çelsit i duhen dy fitore në katër ndeshjet e mbetura për t’u rikthyer te titulli. Një objektiv i bërë akoma më i afërt pas dështimit të Totenhemit të premten.
Mançester Siti fitoi dje 5-0 ndaj Kristëll Pallasit, në përpjekje për të qenë brenda katërshes së parë në klasifikim. Një vend i tretë për të aktualisht, por fitorja sot e Liverpulit ndaj Sauthemptonit do ta zbriste një shkallë më poshtë.
Arsenal – Mançester Junajted është kryendeshja e së dielës, ku udhëtuesit pritet të kenë lënë pushim shumë prej lojtarëve kryesore, për shkak të përqendrimit te Liga e Europës.
Juventusi ka barazuar 1-1 mbrëmë me Torinon në derbin e qytetit; një rezultat që e bën të presë akoma për të fituar trofeun e gjashtë radhazi të Serisë A.
Mund të kishte shkuar më keq për Juventusin nëse Higuain nuk do të shënonte në minutën e 92-të. Një barazim në ekstrem për Juventusin, që pak gjë i duhet në tre javët e mbetura.
Napoli fitoi dje 3-1 ndaj Kaljarit, dhe mori kështu përkohësisht vendin e dytë. Një pozicionim i kushtëzuar nga takimi i kësaj mbrëmjeje midis Milanit dhe Romës. Fitorja e Romës do ta kthente atë në pozitën e ndjekësit më të afërt të Juventusit.
Rivalitet golash në La Liga, ku Barcelona e Reali hahen mes tyre me përmasat e fitoreve ndaj kundërshtarëve.
Gjithçka në barazpeshë, ku dy ekipet e mësipërme kryesojnë me nga 84 pikë, e ku diferencën e bën një ndeshje e prapambetur e Realit, e cila do të luhet dhjetë ditë më pas.
Barcelona mundi të shtunën 4-1 Vilarealin, dhe Reali u përgjigj me një fitore 0-4 në transfertë ndaj Granadës.
E ngushtë qe fitorja e Atletikos së Madridit ndaj Eibarit, 1-0, por mjaftueshëm për t’i konsoliduar vendin e tretë.
Bajerni i Mynihut i ka mbyllur hesapet në Bundesligë, ku e ka bërë të tijin trofeun për të pestin sezon rresht. Rezultati 1-0 i së shtunës ndaj Darmstadtit të vendit të fundit konfirmon shtendosjen e kampionëve të Gjermanisë, të papërpjekur për diçka më shumë.
Lajpcigu e konsolidoi vendin e dytë me një fitore 1-4 në kryeqytet ndaj Hertës së Berlinit. Në betejën për vendin e tretë, Borusia e Dortmundit mposhti 2-1 Hofenhajmin, rivalin e drejtpërdrejtë, duke shkëmbyer vendet mes tyre; Borusia është tani më lart Hofenhajmit.
Monako është pranë titullit kampion në Francë. Në vend të parë, me tre pikë më shumë se PSG-ja, e me një ndeshje më pak të luajtur.
Një titull që i mungon që prej sezonit 1999-2000. E që me shumë gjasa do të fitohet këtë sezon, ku ka bërë paraqitje të shkëlqyera me një tufë të rinj, mes të cilëve spikat Mbappe.
Ndaj Nensit u fitua dje 0-3, edhe pse luhej në fushë kundërshtare. Rivalët e PSG-së e kishin mundur më herët kundërshtarin e tyre: 5-0 ndaj Bastisë.
Nisa e vendit të tretë luan sonte në mbrëmje në transfertën ndaj Olimpikut të Marsejës. /tesheshi.com/
