Ministri i Brendshëm francez, Bernard Cazeneuve, ka premtuar çmontimin gradual të kampit të emigrantëve në veri të vendit, në Kale (Calais), që ndryshe ka marrë emrin “xhungël”.
Ai i ka thënë një gazeta rajonale se do të shkohet me vendosmëri drejt mbylljes së kampit, duke e çmontuar atë dhe duke u krijuar strehë gjetkë në Francë mijëra njerëzve që gjenden aty.
Ndërkohë që nga tetori i shkuar e kanë lënë Kalenë rreth 5.000 azilkërkues, të strehuar në 161 qendra speciale anembanë Francë, qendra të tjera të tilla do të ngrihen për strehimin e mijëra të tjerëve në vitin 2017.
Autoritetet raportojnë për rreth 7.000 emigrantë në kampin “xhungël” të Kalesë, kurse disa grupe ndihmash e çojnë këtë shifër në 10.000.
Mes një përzierje azilkërkuesish, në numër të madh janë afganët, somalezët e sudanezët.
Përndryshe, aktivistë britanikë kanë identifikuar 400 fëmijë që gjenden në këtë kamp e që i plotësojnë kushtet për t’u zhvendosur në Britani. Lista e fëmijëve, shumë prej të cilëve i kanë familjet në Britani, do t’i dorëzohet Ministrisë së Brendshme. Ky institucion ka bërë të njohur se tashmë planifikon t’i transferojë 150 fëmijë në Britani këtë vit. /tesheshi.com/
