Kupa e Kombeve të Afrikës është mbyllur me fitoren e Kamerunit ndaj Egjiptit në finalen e së dielës.
Rezultati 2-1 i dha mundësi Kamerunit ta fitojë për herë të pestë trofeun e aktivitetit, duke u bërë ekipi i dytë më i suksesshëm pas Egjiptit, që e ka fituar shtatë herë Kupën e Kombeve të Afrikës.
Kameruni u kthye të fitojë pas 15 vitesh, që nga 2002-shi, kur mposhtte me 11-metërsha Senegalin pas barazimit pa gola.
Kjo ishte finalja e tretë e luajtur mes Kamerunit dhe Egjiptit, të fituar në dy herët e shkuara nga ky i fundit. Të ndeshur në finale në 1986-n, Egjipti do të shpallej fitues pas gjuajtjes së penalltive; në një tjetër finale mes tyre, në 2008-n, Egjipti fitonte 1-0.
Për Egjiptin qe hera e parë që mundej në finale që nga viti 1952. Egjiptianët u dukën se do ta fitojnë sërish trofeun teksa kryesuan mbrëmë në finale që nga minuta e 22-të. Pas barazimit në minutën e 59-të, ëndrrave të Egjiptit do t’u jepte fund Aboubakar, që do të shënonte një gol të mrekullueshëm në mbarim në ndeshjes.
Kameruni e nisi veprimtarinë duke mos u marrë në konsideratë për shkak të mungesës së emrave të mëdhenj në skuadër, aq sa pritej të eliminohej që në fazën në grupe. Ecuria tregoi krejt të kundërtën. Në çerekfinale, Kameruni eliminoi Senegalin me 11-metërsha, për të mundur 2-0 Ganën më pas në gjysmëfinale. /tesheshi.com/
