Përveç zgjedhjeve të sotme në Dibër, rezultati i të cilave do të jetë i rëndësishëm për lëvizjen tektonike në politikë, e veccanërisht në mazhorancë, një tjetër provë e aleancës mes PS-së dhe LSI-së pas Dibrës janë edhe dy ligje të dërguara nga parlament nga partitë respektive, që kërkojnë votat e njëri-tjetrit.
I pari është ligji për kamerat e sigurisë, i hartuar nga Ministria e Brendshme. Sinjali i parë u dha të enjten në sallën e Parlamentit, ku PS kërkoi që dekreti i Bujar Nishanit të shtyhet.
Mësohet se kjo ndodhi edhe pse LSI nuk kishte dhënë garanci se do e rrëzonte. Prej kohësh, kjo forcë politike e ka kundërshtuar dhe pa votat e saj miratimi është i pamundur.
Në komisionin Parlamentar të Sigurisë Kombëtare, socialistët deklaruan se ligji është i kompletuar dhe nuk ka nevojë për rishqyrtim. Duhet theksuar se ai u miratua një herë, por Presidenti e ktheu për rishqyrtim.
Pas kësaj, LSI ka hezituar duke abstenuar në komision. Fillimisht u tha se ai do rishikohej, por deputetët e PS kanë thënë se nuk do e bëjnë një gjë të tillë, duke mos pranuar sugjerimet e PD-së dhe të LSI-së. Dekreti pritet që të jetë në seancën e ardhshme në sallë dhe mbetet të shihet qëndrimi i LSI-së.
Një tjetër ligj që sjell përplasje mes dy aleatëve është ai për koncesionet. Bëhet fjalë për një draft të propozuar nga LSI, i cili ndryshon rregullat e dhënies së koncesioneve. Ligji nuk është futur në kalendarin e punimeve, teksa mësohet se është bllokuar nga socialistët.
Ky ligj ka shkuar në Kuvend që në muajin shkurt dhe sërish nuk e ka gjetur dritën e miratimit. LSI ka kërkuar që çdo koncesion që është mbi 4 vjet të miratohet nga Parlamenti, por kjo nuk është pranuar nga PS-ja.
Deri më tani janë zhvilluar vetëm dy seanca në komisione dhe deputetët e PS, sidomos Eduard Shalsi e ka kritikuar ashpër. Nga ana tjetër, LSI e ka bërë të qartë se do këmbëngulë që ligji të miratohet sa më shpejt, por duket se po has në një bllokadë shumë të fortë të socialistëve, të cilët duan që ekskluzivitetin e koncesioneve ta ketë qeveria. /tesheshi.com/
