Kameramania që shokoi publikun me veprimin e saj kur pengoi refugjatët që po largoheshin për t’i ikur policisë hungareze, mund të dënohet për krim urrejtjeje. Ekspertët thonë se gjesti i saj mund të klasifikohet krim për shkak të urrejtjes e sipas ligjeve hungareze merr deri në shtatë vjet burg.
Gruaja, kameramane e një televizioni privat në Hungari u fotografua duke qëlluar me shqelm dhe duke i penguar refugjatët ndërsa i iknin policisë. Gruaja u pushua nga puna nga ana e televizionit për të cilin punonte pasi videot u shpërndanë në rrjetet sociale.
Në disa filmime, gruaja, shihet sesi godet një vajzë dhe pengon një burrë që mbante në krah një fëmijë, ndërsa qindra refugjatë, shumë prej të cilëve sirianë, po i largoheshin policisë në kufirin jugor të Hungarisë me Serbinë.
“Një punonjëse e televizionit N1 tregoi një sjellje të papranueshme në pikëkalimin Roszke”, njoftoi vetë televizioni me anë të një deklarate. “Ne përfunduam kontratën e kameramanes sonë, veprim që hyn në fuqi menjëherë”, thuhet në deklaratë.
Kryeredaktori i stacionit televiziv tha për agjencinë “Reuters” se beson se ka bërë gjënë e duhur në këtë rast. “Ne nuk e kuptojmë sesi mundi të ndodhë, është shokuese dhe e papranueshme”.
Qeveria e krahut të djathtë në Hungari mban qëndrim të ashpër sa I takon fluksit të refugjatëve në kufijtë e saj, të cilët përpiqen të kalojnë Hungarinë në rrugën e tyre drejt perëndimit të Europës, duke i përshkruar ata si një kërcënim për prosperitetin europian dhe “vlerat kristiane”.
Kanali televiziv N1 shfaq një emision të përjavshëm me Gabor Vona, liderin e partisë së të djathtës ekstreme Jobbik. Kanali vetëdeklarohet se mbron çështjet kombëtare. /tesheshi.com/
