Drafti reformës në drejtësi ka kaluar nen për nen pa votat e PD-së, por të PS-së dhe LSI-së në Komisionin e Posaçëm Parlamentar.
Tashmë pas dy javësh votimi do të bëhet në sallën e Kuvendit me votim nominal, por deri atëherë ka ende një rrugë që opozita mund të futet në proces.
Nëse ndodh atëherë gjithsesi mësohet se janë siguruar 94 votat e duhura për të kaluar draftin e reformës.
Por LSI ka shkaktuar një tronditje kur mblodhi kryesinë dhe më pas Ilir Meta deklaroi se nuk ka reformë pa konsensusin e opozitës.
Kjo deklaratë ka rritur alarmin e ndërkombëtarëve dhe menjëherë ambasadorët e SHBA-së dhe BE-së Donald Lu dhe Romana Vllahutin kanë mbërritur në zyrën e Metës në Kuvend.
Pas një diskutimi 30 minutësh, dy diplomatët kanë shkuar në mbledhjen e Komisionit të Reformës, ku kanë qëndruar deri sa është miratuar nen për nen drafti final.
Përfaqësuesi i PD-së, Oert Bylykbashi ka shkuar sa për të bërë “ta” e më pas është larguar, ndërsa deklaroi se nuk ishte përfillur kërkesa e PD-së për vendet e rezervuara në komisionin e skanimit të gjyqtarëve.
Ndërkaq, ambasadorët kanë ndjekur votimin në Komision dhe aty përfaqësuesi i Lëvizjes Socialiste Petrit Vasili ka ngritur kartonin jeshil.
Pas mbledhjes ambasadorët janë tërhequr në një mbledhje të përbashkët të diplomatëve perëndimorë në Tiranë. Ata prisnin sinjalet e ambasadës gjermane pas takimit të ministrit të Jashtëm Steinmeier me kreun e opozitës Lulzim Basha.
Por kreu i PD-së me një postim në Facebook ka shuar shpresat për një zgjidhje të shpejtë.
“Kryetari i Partisë Demokratike i bëri të ditur ministrit të jashtëm gjerman tentativën e Edi Ramës për të shantazhuar dhe blerë vota nga deputetët e opozitës për miratimin në mënyrë të njëanshem të reformës në drejtësi. Kjo, theksoi kreu i PD do të jetë fundi i këtij parlamenti. Zoti Basha rikonfirmoi para ministrit të Jashtëm gjerman qëndrimin e bërë publik se, nëse trafikohet qoftë edhe një mandat i opozitës atëherë opozita do të djegë mandatet dhe do t’i drejtohet qytetarëve”, shkruhet në njoftimin e shpërndarë në faqen e Bashës në Facebook.
Nga moment në moment pritet një deklaratë zyrtare e të gjithë ambasadorëve të SHBA-së dhe vendeve të BE-së në Tiranë për këtë çështje. Ndërkaq burime diplomatike i bënë të ditur tesheshi.com se deklarata mbi “përgjegjësinë individuale” të deputetëve qëndron.
Këto ditë pritet që dy deputetë të PD-së të dalin publikisht dhe të shprehin hapur votën pro reformës në drejtësi, duke e dhënë si qëndrim politik pro perëndimit. Pikërisht kjo deklaratë publike do të vërë para faktit të kryer Bashën nëse do t’i përjashtojë apo jo dy parlamentarët e yij. Pas kësaj deklarate pritet që edhe të tjerë deputetë të shpallin një fraksion politik dhe do ta akuzojnë lidershipin e PD-së që udhëhiqet nga interesa personale të disa krerëve.
Nëse ndodh kjo, ka shumë gjasa që Basha të jetë nën presion që çfarë vendimi të marrë, por edhe mazhoranca pritet që të bëjë një lëshim të radhës, por jo jashtë “vijës së kuqe” që shpalli Edi Rama një ditë më parë./tesheshi.com/
