Numri i vdekjeve nga sulmet në zemër dhe tru në Mbretërinë e Bashkuar do të rritet ndjeshëm në dekadën pas Brexit, e kjo për shkak të rritjes në çmimet e frutave dhe perimeve, sipas një studimi të ri.
Britania është shumë e varur nga importet e ushqimit, veçanërisht fruta dhe perime, si dhe siç është konkluduar nga një analizë e publikuar në revistën BMJ Open, parashikohet një rënie e konsumit të ushqimit të shëndetshëm në të gjithë skenarët Brexit.
Në rast të një të ashtuquajturi Hard Brexit, nga i cili Britania do të largohet nga BE-ja pa marrëveshje për marrëdhënie tregtare në të ardhmen, shkencëtarët nga Kolegji Mbretëror në Londër parashikojnë të paktën 12.400 të vdekur shtesë nga sëmundjet kardiovaskulare në dekadën pas Brexit.
“Sipas rregullave të OBT-së, çmimi i bananes u rrit në 17 për qind, portokalli me 14 për qind dhe është e qartë se frutat dhe perimet të cilat janë të importuara do të jenë më të prekura nga rritja e çmimeve”, ka thënë autori kryesor i studimit, Christopher Millet.
Në Mbretërinë e Bashkuar, sipas të dhënave të një fondacioni për sëmundje të zemrës dhe ato kardiovaskulare, çdo vit vdesin 42,000 njerëz.
“Me një Brexit pa marrëveshje ne presim një shtesë prej 12.400 të vdekurish në mes të 2021 dhe 2030, ndërsa në rastin e daljes me një marrëveshje, ne presim 6.000 të vdekur më shumë”, tha Millet.
Frutat dhe perimet përmbajnë lëndë ushqyese vitale si vitamina, minerale dhe antioksidantë, të cilat ndihmojnë në funksionimin kardiovaskular.
Në 2017, Britania importoi 84 për qind të frutave dhe 48 për qind të perimeve, dhe shumica e tyre erdhën nga vendet e BE.
Pas Brexit do të ketë probleme dhe me importet nga vendet e treta, sepse Britania do të duhet të pranojë rregullat e OBT-së ose do të menaxhojë konfliktet e negociatave të tregtisë bilaterale.
Millet dhe ekipi i tij, pas analizës së të dhënave erdhi në supozimin se një Brexit i vështirë do të çojë me pakësimin e frutave në treg me 11.4 përqind, ndërsa perimet do të pakësohen me 9 për qind.
“Kjo është serioze. Familja britanike për fruta dhe perime do të paguajë më shumë, e kjo do të jetë një barë financiare dhe e gjithë situata do të ketë pasoja të rënda për shëndetin”, tha Millet. /tesheshi.com/
