Atifete Jahjaga mund të rizgjidhet presidente e Kosovës edhe për një mandat tjetër, ndërsa i kanë mbetur vetëm tetë muaj në detyrë, por kjo nëse Gjykata Speciale “bllokon” rrugën e Hashim Thaçit.
Analistët në Kosovë të pyetur për këtë mundësi, e shohin të arsyetuar shpresën e presidentes për të qëndruar deri në 2021 në krye të shtetit të Kosovës. Por, gjithsesi, ajo nuk është shprehur asnjëherë se e ka një synim të tillë.
Ka nga ata që thonë se vetë Jahjaga është duke shpresuar edhe në një mandat të ri, duke besuar se Gjykata Speciale do ta “heqë” nga skena politike, Hashim Thaçin. Të tjerë thonë se jo vetëm gjykata Speciale e cila mund të nisë hetimet për Thaçin e kështu t’ia pamundësojë kandidimin për postin e lartë shtetëror, por edhe kundërshtia ndaj tij mes deputetëve të LDK-së, janë faktorë që ndihmojnë Jahjagën.
Kalkulimet shkojnë edhe më tej, nëse kihet parasysh se koalicioni aktual LDK-PDK qëndron mbi kushtin “Thaçi president”. Nëse ky kusht nuk arrihet, mund të prishet marrëveshja dhe Jahjaga nuk është pjesë e skemës, por mund të qëndrojë në detyrë sa të gjendet një zgjidhje. /tesheshi.com/
