Transferimi i Mërgim Mavrajt te Hamburgu mori përfundimisht dje formë zyrtare. Mbrojtësi i përfaqësueses së Shqipërisë la Këlnin, një ekip që renditet në vendet e sipërme të Bundesligës, për të kaluar te Hamburgu, skuadra me shumë histori, por që në këtë sezon rrezikon të bjerë një kategori më poshtë.
Lajmi i transferimit të Mavrajt nuk ka kaluar në heshtje; një pjesë e mirë e medias së huaj sportive e ka bërë të ditur atë duke dhënë dhe një portret të lojtarit.
Mes të tjerash, në portalin e njohur goal.com thuhet: “Lojtari i përfaqësueses së Shqipërisë nënshkroi një marrëveshje… për t’i ndërruar klubet e Bundesligës gjatë transferimeve të janarit, dhe nuk ka frikë t’i bashkohet një ekipi që rrezikon rënien një kategori më poshtë.”
“Me 30-vjeçarin që e pranon se vendimi për t’iu bashkuar Hamburgut… mund të duket i çuditshëm, ai nuk ka dyshim se ka bërë lëvizjen e duhur,” lexohet gjithashtu te goal.com.
“Kjo ka qenë sigurisht një surprizë për shumë njerëz, por situata me kontratën time në mbarim te Këlni, si dhe interesi i madh nga trajneri e drejtuesit e Hamburgut, më bënë në fund ta ndërmarr këtë hap,” janë fjalët e Mavrajt të përcjella te ky portal sportiv.
“Për mua ana ana njerëzore është shumë e rëndësishme, sepse dua të kujtohem jo vetëm si një lojtar i mirë, por gjithashtu si një njeri i mirë,” raportohet të ketë thënë mbrojtësi tashmë i Hamburgut.
Mërgim Mavraj e ka çuar tërë karrierën në Gjermani. Posaçërisht ky sezon ka qenë një kulm i tij, pasi ai u kthye në një lojtar të pazëvendësueshëm te Këlni, te skuadra që deri më tash ka bërë paraqitje mjaft të mira.
Një kontribut i jashtëzakonshëm, reflektuar te falënderimi i klubit gjerman për Mavrajn: “Faleminderit për kohën tuaj te Këlni, Mërgim!” /tesheshi.com/
