Shkrimtari kosovar fiton çmimin “Kadare” me romanin e tij “Profeti nga Praga
Musa Ramadani me romanin e tij “Profeti nga Praga”, një rrëfim i veçantë filozofik me personazh shkrimtarin e famshëm të shekullit XX Franc Kafka, është shpallur dje fitues i çmimit me vlerën më të lartë për letrat shqipe, çmimi “Kadare”. Çmimi që mban vlerën 10 mijë euro akordohet nga Instituti Europian Pashko dhe për herë të parë shkon në Kosovë tek një shkrimtar mjaft i njohur atje, por pak i njohur brenda kufijve të Shqipërisë.
Ramadani merr në konsideratë një personazh mitik, siç është shkrimtari Franc Kafka. Shkrimtari hebre-gjerman-çek, Kafka, pas 41 vitesh nga humbja, në 82-vjetorin e ngjizjes, krejt befas rishfaqet në vendlindjen e tij. Vizione krejt të vonuara, copëza reminishencash nga takimet me mikun e humbur, kthimi në shtëpinë e lindjes, fanitjet, kujtimet fëmijërore etj., bëhen objekt trajtimi të këtij romani. Profeti nga Praga ka elemente dokumentare, i ndërtuar pjesërisht mbi shenjat biografike të Kafkës, por edhe metafizike e mistike.
Çmimi që jepet për dorëshkrimin më të mirë në prozën shqipe solli të paktën 36 prurje të reja këtë vit, ndër ta dhe shumë emra të njohur të letërsisë, por dhe të rinj.
Motivacioni i jurisë për veprën fituese ishte: “Musa Ramadani me “Profeti nga Praga” ka sjellë një roman të veçantë si për nga forma, ashtu dhe nga përmbajtja. Duke qenë i strukturuar në tregime të lidhura fort me njëra-tjetrën, “Profeti nga Praga” shpërfaqet si një mozaik rrëfimesh dhe kolazh teknikash narrative, një roman për letërsinë si tekst kënaqësie dhe akt përjetësie, ku krijuesi shpaloset si një libër i hapur ndaj konteksteve dhe konotimeve të ndryshme”.
Në finale shkrimtari nga Kosova u përball me shkrimtarin nga Shqipëria, Virion Graçi, por votat e jurisë favorizuar rrëfimin letrar-filozofik të Ramadanit.
Ramadani ka lindur në vitin 1944, në Gjilan, Kosovë dhe ka një përvojë të jashtëzakonshme jetësore dhe letrare. Më shkrimin lidhjet janë të hershme, që prej vitit 1965 si gazetar, recensent teatror dhe redaktor i rubrikës së kulturës në gazetën “Rilindja”, dhe në pak vite i jepet në Kosovë çmimi i parë në poezi e prozë që e kanë motivuar për të vazhduar me letërsinë. Është laureat i çmimit “Hivzi Sylejmani” për librin “Satana ma vodhi gurin e urtisë” më 1987, i çmimit të Shoqatës së Shkrimtarëve të Kosovës për librin “Inamor: 55” në vitin 2000, i Çmimit “Beqir Musliu” për vepër karriere më 2006 dhe i Çmimit Kombëtar për Vepër Jetësore “Azem Shkreli” më 2013. Ka një krijimtari letrare intensive prej ‘69-s dhe deri sot. E njëjta gjurmë, pandërprerë në poezi e prozë, e cilësuar si letërsi e erudicionit të thellë, me element moderne dhe postmoderne, por ka një pasuri letrare më vete edhe në shkrimin e dramës. Veprat e tij në prozë janë: “Romani pa Kornizë”, roman (1975), “Fluroma”, tregime (1978), “Zezona”, roman (1978), “Ligatina”, roman (1983), “Satana ma vodhi gurin e urtisë”, tregime (1987), “Vrapuesja e Prizrenit”, roman (1995), “Antiprocesioni”, roman (1997), “Inamor: 55”, minitregime (2000)./tesheshi.com/
