Nga Blendi Gashi
Dy ditë më parë, në hapje të fushatës zgjedhore Kadri Veseli, Ramush Haradinaj e Fatmir Limaj për herë të parë u ulën fare pranë njëri-tjetrit dhe u përqafuan ngrohtësisht, duke harruar kështu akuzat dhe hidhërimet e mëhershme.
Ish-krerët e UÇK-së, siç duket nostalgjikë për kohën e luftës kur për ta gjithçka ishte flamuri kuqezi, vendosën që kampanjen e tyre zgjedhore ta fillojnë me intonimin e himnit kombëtar të intepretuar nga Kastriot Tusha, teksa organizatorët e partive respektive që drejtohen prej tyre, shpërndanin edhe flamuj kuqezi, të Amerikës dhe sigurisht të shtetit.
Por duhet kujtuar se për një të tillë gjest, përdorimin e flamurit kombëtar në fushatë, ata dikur janë tallur me Vetëvendosjen kur ka bërë të njëjtën gjë, duke i quajtur drejtuesit e kësaj të fundit si “patriota të mëdhenj”. Por ja që epshi për vota shkel çdo parim, etikë e standart. Por kjo nuk është hiç gjë në raport me një të dhënë tjetër. Sepse nën atmosferën e “patriotizmit” të tyre, ata i morrën mbarë jo vetëm premtimet, por dhe ca atribute lufte, veteranë e invalidë, madje dhe Majlinda Kelmendin e xhudos, por pa e pëmendur në asnjë rast famijen heroike nga Prekazi dhe komandantin legjendar Adem Jashari.
Haradinaj, tha se “Ndër shekuj u flijuan shqiptarët më të mirë që të arrijnë lirinë, pavarësinë dhe demokracinë. Lavdi të rënëve për liri! Pushtuesit erdhën e shkuan, s’i mbajti kjo tokë. Regjime e pushtete u ndërruan, Ne mbetëm! Askush s’e mundi Kosovën. Ashtu si e ruajtën njerëzit e vet Kosovën, ashtu e ruajti Zoti për ne. Ne, që e ruajtëm me mijëra vjet Kosovën, Ne jemi integriteti territorial, ne jemi sovraniteti, ne jemi kufijtë e sigurt, ne jemi ushtria dhe ne jemi bijtë e bijat e kësaj toke”, tha Haradinaj.
Siç mund të vërehet ai përmendi të rënët për liri, foli për mundjen e pushtuesve dhe ruajtjen e Kosovës, por nuk përmendi kontributin e Jasharajve.
Edhe Veseli foli përmendi veteranët, invalidët e luftës dhe familjet e martirëve dhe dëshmorëve të lirisë, ë cilët i quajti si burim i “Fillimit të Ri”, por as ai nuk përmendi sakrificën e bërë nga Adem Jashari dhe Prekazi i tij.
“Qershori, është muaji i lirisë, i UÇK-së, është muaji i madhi çlirimit. Më 11 qershor populli ynë do të qëndroj i bashkuar për ti hapur rrugë një Kosove të re. Fillimit të ri”, tha ai.
Por Veseli nuk harroi të bëj lavde për vete dhe Haradinaj me ç’rast tha se “një lidership që më shumë se për vete, mendon për përgjegjësinë që ka ndaj atdheut, sakrificës sonë dje dhe mbi të gjitha punon për të sotmen dhe të ardhmen më të mirë të vendit dhe kombit tonë”.
Veseli ndërkaq nuk harroi të kujtojë triumfin e Majlinda Kelmendit dhe lartësimin e flamurit të Kosovës në botë, ndërsa flamurin kuqezi e quajti flamur të lirisë.
Kurse Limaj tha se janë bërë bashkë “për një Kosovë të dinjitetshme, për një Kosovë ku çdo kush do të ndihet krenar për atdheun e tyre”.
Pra, në ligjërimin e aleancës PDK-AKR-NISMA, Majlinda Kelmendi ka zënë vendin e Adem Jasharit. /tesheshi.com/
