Kryekuvendari Kadri Veseli, pas një takimi me shefen e Zyrës së BE-së në Kosovë, Nataliya Apostolova dhe me ambasadorët e shteteve të BE-së në Kosovë, ka siguruar ata sot do të përfundohet drama, duke u votuar Demarkacioni në orën 11:.00.
“Kemi sakrifikuar shumë si vend, nuk do të lejojmë që për ego të askujt ky mund i joni të shkojë huq. Sot do ta përfundojmë ratifikimin e kufirit me shtetin mik, Malin e Zi”, tha ai.
Kurse Apostolova tha se sot është ditë e rëndësishme për Kosovën dhe qytetarët e saj, pasi ka gjasë që të zgjidhet çështja e demarkacionit.
“Sot është ditë e rëndësishme për Kosovën ku një ngjarje, e cila që një kohë të gjatë ka gjasë të përfundohet, pra është marrëveshja për demarkacionin. Kjo është një nga dy kriteret dhe thërras politikanët që të mos i mbajnë qytetarët e tyre të izoluar drejt integrimit në BE”, tha ajo.
Apostolova tha se kanë biseduar në detaje se cila do të jetë puna e Asamblesë për javën dhe muajin tjetër në kohën kur do të publikohet raporti për Kosovën.
Kujtojmë se Kuvendi mbrëmë zhvilloi një debat maratonik prej nëntë orësh ku deputetët në fjalimet e tyre u deklaruan “pro et contra” ratifikimit të kësaj marrëveshjeje. /tesheshi.com/
