Kadri Veseli shpreson në Kosovën “Zvicër e Ballkanit”

Kreu i Kuvendit të Kosovës që aspiron të bëhet dhe kryeministër, tha se  “Kosova i ka të gjitha mundësitë që të jetë ‘Zvicra e Ballkanit’; dhe kjo sipas tij nëse arrin të shfrytëzojë të gjitha resurset e veta dhe se do t’ia dalë t’i shfrytëzojë ato.

I ftuar në Top Show, Veseli tha se edhe pse një shtet i ri, Kosova është shumë më para se Shqipëria apo Maqedonia në disa drejtime

“Ne kemi vetëm 9 vite shtet dhe kemi bërë shumë hapa të rëndësishëm para, në drejtim të funksionimit normal të një shteti. Krahasuar me Shqipërinë dhe Maqedoninë, të cilat kanë shumë vite që funksionojnë si shtete, ne jemi në rrugën e duhur dhe madje në disa aspekte jemi shumë më mirë sesa ato”, tha Veseli.

Sa i përket çështjes së nxehtë Demarkacionit, Veseli tha se ka shumë arsye përse duhet ratifikuar dhe aq më tepër kur bëhet fjalë për Malin e Zi.

“Mali i Zi është një ndër shtetet e para që na ka njohur dhe kemi një marrëdhënie pozitive me ata. Ne jemi përcaktuar për të respektuar sovranitetin territorial të fqinjëve tanë, ashtu si kemi bërë edhe me Maqedoninë dhe Shqipërinë. Kufiri me Malin e Zi është një realitet që duhet pranuar dhe respektuar dhe Demarkacioni me ta duhet të kalojë sa më shpejt. Kosovarët duhet ti besojnë institucioneve shtetërore dhe të jenë të bindur që me Demarkacionin nuk dëmtohet dhe nuk i merret asnjë metër katror Kosovës”, duke vijuar më pas të sqaojë dhe Asosacionin e Komunave serbe, ndryshe “Zajednicën”, që sipas tij nuk duhet parë me frikë.

“Ne nuk kemi asnjë rrezik nga qytetarët serbë në Kosovë, por vetëm nga Serbia dhe Rusia. Ne duhet të ecim para, me mbështetjen e partnerëve tanë dhe të ngrejmë sa më shpejt ushtrinë tonë”, shtoi kreu i Kuvendit të Kosovës, njeriu që gjithashtu pason Hashim Thaçin në krye të PDK-së. /tesheshi.com/