Kryetari i Kuvendit të Kosovës, Kadri Veseli po vazhdon përpjekjet për të dënuar krimet e kryera nga forcat serbe gjatë luftës në Kosovë.
Krahas vendimit për të themeluar Tribunalin Ndërkombëtar për krimet e Serbisë në Kosovë, ai po propozon që të ndërtohet edhe Muzeu i Gjenocidit.
Kështu, ai ka vizituar lokacionin te ish-Tjegullorja në Prishtinë, dhe pikërisht aty po propozon që të ndërtohet Muzeu i Gjenocidit në Kosovë.
Teksa ka folur për vendimet që do të marrin të enjten për të nisur hapat për themelimin e Tribunalit Ndërkombëtar për krimet e Serbisë në Kosovë, Veseli ka thënë se Muzeu në Kosovë do të ketë ngjashmëri me Muzeun e Holokaustit-Yad Vashem në Izrael.
”Muzeu nuk do të jetë thjesht një ekspozitë por edhe një institucion shumëdimensional që do të mbështetet në pesë fusha veprimtarie: Një është përkujtimi i viktimave të krimeve të bëra. Së dyti do të shërbejë si qendër dokumentimi dhe arkivimi të evidencave dhe fakteve të luftës, se treti do të shërbejë si qendër ndërkombëtare hulumtimi për studiuesit e fushës, së katërti do të ketë rol edukativ për brezat e ardhshëm të memories kolektive së pesti do të ketë një rol proaktiv në gjetjen dhe përgatitjen e akuzave për kriminelët e luftës.
Ai tha se do të huazojnë nga përvojat më të mira ndërkombëtare të muzeve të gjenocidit sikurse janë Yad Vashem apo Simon Wiesenthal Center”. /tesheshi.com/
